بنجائی وزیر حوالکاری عطاء اللہ تارڑ نا سی ڈی اے ناکنڈآن مارگلہ ہلز اٹی شجرکاری مہم نا بابت دود آن تران

اسلام آباد۔ 22 جولائی (اے پی پی) بنجائی وزیر حوالکاری ، شینکاری، قومی میرات و دودوربیدہ عطاء اللہ تارڑ پارینے کہ بروک آ وخت اٹی موسمیاتی بدلی بھاز بھلو چیلنج اس مریک، ننے تینا چین تے رکھ کننگ کن زیات آن زیات درخت خلوئی مریک۔ داخیال آتا درشانی ءِ او دوشنبے نادے آ داڑے کیپیٹل ڈویلپمنٹ اتھارٹی (سی ڈی اے) نا کنڈآن مارگلہ ہلز اٹی شجرکاری مہم نا بابت اڈہلوک دود آن تران کرساکرے۔ بنجائی وزیر حوالکاری پارے کہ اسلام آباد نا شمار زیباانگا شار تیٹی مریک، ننے گمر ءِ کہ اسلام آباد ننا کیپیٹل ءِ ، دنیا نا گیشتر ملک آک ایلو ملک آتیان درخت و بئے درآمد کرسا تینا ملک اٹی خلیرہ، اللہ تعالیٰ نا شکر ءِ کہ او ننے زیباءُ دارالحکومت اس تس۔ اوپارے کہ مارگلہ نیشنل پارک اسلام آباد نا پہچان ءِ ہراڑآ نن گمر کینہ۔ اوپارے کہ درخت زند انا نشانی ءِ، درخت ارے تو نن ارین، نن خوش نصیب اُن کہ ننا زیات وخت اسلام آباد اٹی گدرینگک، اسلام آباد اٹی تہوانا آب ایلو شارتیان جوان ءِ۔ داڑے زیات آن زیات درخت خلنگ آن چاگڑد اٹی پین گچینی بریک۔ اوپارے کہ ’’سیلفی و داے ٹری‘‘ نا پن اٹ  شجرکاری مہم نا بناءِ کننگ انگ ءِ۔ اسلام آباد نا شاری تیان خواست ءِ کہ او زیات آن زیات درخت و نیال خلیر۔ بنجائی وزیر حوالکاری سلاہ تس کہ بنجائی دارالحکومت اٹی گرین روف ٹاپ پروجیکٹ نا بناءِ کننگے، دنیا نا چندی ملک آک گرین روف ٹاپ انا کنڈآ ہِننگ ءُ، اسلام آباد اٹی روف ٹاپ آ بے پناہ جاگہ ارے ہراڑے نیال ودرخت خلنگ مریک۔ اوپارے کہ گرین روف ٹاپ آن مچ آ اسلام آباد سرسوز نظربریک۔ بنجائی وزیر حوالکاری مارگلہ نیشنل پارک اٹی خاخر لگنگ نا واقعہ غاتا ذکر ءِ کرسا پارے کہ خاخر لگنگ نا سوب آن نسخان ہم مس ولے سی ڈی اے، وزارت موسمیاتی بدلی، فائربریگیڈ، محکمہ جنگلات آتا ٹیم تے خراج تحسین پیش کیوہ کہ اوتینا جون تے دلدست آ تخسا نن نیمہ اسکان خاخر ءِ کسفنگ نا کوشست آتے سرتسر، اگہ جاگہ اس تخریب کاری نا عنصر ساڑی ئس تو اونا برخلاف کارروائی ہم کننگا۔ اوپارے کہ بروک آ وخت آتیٹی موسمیاتی بدلی بھاز بھلو چیلنج اس مریک۔ بنجائی وزیر پارے کہ پاکستان نا کاربن نا اخراج اٹی بیرہ اِرا درسد بشخ ءِ ولے اونا 90 درسد نسخان ءِ نن سگنہ۔ ننا داڑے نوکاپ بریک ، تہو انا آب خراب مریک تو اوٹی ننا قصور اف، دنیا نا گیشتر ملک آتیٹی کاربن نا پیش تمنگ زیات ءِ، ہرانا سوب آن چاگڑد ءِ زیات نسخان سرمریک، دا ملک آتیا زمہ واری مریک کہ او حکومت پاکستان تون کمک کیر۔ اوپارے کہ موسمیاتی بدلی مچ آانسانیت نا ویل ءِ، انسانیت و آخبت نا چین تا خاطر ننے زیات آن زیات بشخ ہلسا شجرکاری ٹی بشخ ہلوئی مریک و اودے قومی زمواری و بروک آ چین تا ویل اس تکسا سنجیدگی اٹ انجام تروئی مریک۔ بنجائی وزیرپارے کہ اسکول و کالج آتون اوار ایلو جاگہ غاتیا شجرکاری مہم نا است بڈیءِ کروئی مریک۔ بنجائی وزیر حوالکاری پارے کہ مارگلہ نیشنل پارک نا رکھ ءِ کننگ ہم ننا زمواری ءِ ، اسلام آباد نا شاریک دا رداٹ تینا کڑد ءِ ادا کیر۔ بنجائی وزیرپارے کہ ’’ٹریک یوئرٹری(Track Your tree)‘‘ نا پن اٹ زوت ایپلی کیشن اس لانچ مریک، اونا ویب سائٹ مہالو آن ساڑی ءِ، داایپلی کیشن نا کمک اٹ شاریک تینا خلوک آ نیال و درخت انا نشوونما و ودکی ءِ ہُننگ کیرہ۔ بنجائی وزیر حوالکاری پارے کہ ننا بقادرخت آتون ءِ، ننے درخت خلنگ کن تینا پبی کڑد ءِ ادا کروئی مریک۔ اوپارے کہ وزیراعظم شہباز شریف و حکومت پاکستان اسلام آباد نا چاگڑد ءِ ساف تخنگ و داڑے زیات آن زیات درخت خلنگ کن سنبرینگوک ءِ۔ اوپارے کہ ہر شاری نا ہم زمواری  ءِ کہ او درخت خلنگ کن تینا کڑد ءِ ادا کیر۔ اوپاکستان براڈ کاسٹرزایسوسی ایشن ءِ پارے کہ اوٹی وی چینل آتا ٹاک شوتیٹی خصوصی پروگرام تا بست وبند ءِ کیر تانکہ الس اٹ درخت خلنگ نا اہمیت نا بارواٹی آگاہی ودی کننگ مرے۔ اوپارے کہ میڈیا راج انا ذہن سازی ءِ کیک و راج انا ویل آتے تالان کیک۔ اوپارےکہ کوویڈ۔ 19 اٹی مچ آ دنیا ٹی لاک ڈاؤن خلنگا، بھاز انگا مخلوق زہمی مس، ننا زمواری ءِ کہ نن تینا آب وہوا ءِ ساف تخن، زیات آن زیات درخت خلین و تینابروک آ چین تا آخبت ءِ رکھ کین۔ بنجائی وزیر حوالکاری پارے کہ او کابینہ نا غٹ باسک آتے سلاہ ایتک کہ او ہروزارت اٹی درخت خلنگ نا شیڈول اس تیار کیر ہراڑے مخلوق ءِ درخت خلنگ نا ترغیب تننگ مرے۔