اسلام آباد۔22جولائی (اے پی پی): نائب مزن وزیر ءُ دری کارانی وزیر محمد اسحاق ڈارء ِ سروکی ءَ یک مزن تک ءِ دیوانے دوشمبے ءِ روچءَ بوتگ کہ آئیءِ تہا اوورسیز پاکستانی آنی پلاحءُ گیبود ءِ حوالگءَ بازیں جیڑہ آنی سرءَ چارءُ بچار کنگ بوتگ۔ دری کارانی کارگس ءِ نیمگءَ چہ شنگ بوتگیں بیان ءِ ردءَ دیوانءَ دری کارانی سیکرٹری، تہی کارانی سیکرٹری، ڈی جی IMPASS ءُ دری کارانی وزارتءِ سینئر حکام ہوار بوتگ اَنت۔ نائب مزن وزیر ءُ دری کارانی وزیر ءَ را تہی کارانی سیکرٹری ءُ ڈی جی IMPASS ءِ نیمگءَ چہ ڈنی ملک نندوکیں پاکستانی آناں پہ وہد پاسپورٹ ءِ جوڑ کنگءِ آسراتی ءِ حوالگءَ بریفنگ دیئگ بوتگ۔ دیوان ءَ ڈنی ملک ءَ اسائلم ءِ وائشت مندیں مردمانی ھاترءَ پاکستانی پاسپورٹ ءِ جوڑ کنگ مھتل کنگ ءِ 5 جون 2024 ءِ سرکلرءَ را زوت واتر زورگءِ پیسلہ کنگ بوتگ۔ نائب مزن وزیر ءَ را اوست دیئگ بوتگ کہ زِرءَ آ دیم پاکستانی آناں پاسپورٹ 60 روچانی تہا دئیگ بنت۔
