اسلام آباد۔ 19 جولائی (اے پی پی) وزیراعظم محمد شہباز شریف پارینے کہ ہواوے نا کمک اٹ سالانہ مسہ لکھ پاکستانی طالب علم آتے انفارمیشن ٹیکنالوجی نا کسبی تربیت آن ملک انا آئی ٹی برآمد آک ودرہ، خودکار ، پوسکن و ترند تر گورننس نا نظام نا نفاذ کن حکومتی ادارہ غاتا ڈیجیٹائزیشن وخت انا اہم ءُ گرج اسے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون ہواوے پاکستان نا چیف ایگزیکٹیو آفیسر ایتھن سن نا کماشی ٹی چار باسکی ڈل اوڑدہی کرے۔ داوخت آ گپ وتران کرسا وزیراعظم محمد شہباز شریف پارے کہ ساڑی آ دورہ ءِ چین اٹی ہواوے ہیڈ کوارٹر نا دورہ بھاز فائدہ ئی ئس، ہواوے آن چندی بشخ آتیٹی خاص کر ورناتے انفارمیشن ٹیکنالوجی نا پوسکن تربیت فراوان کننگ کن شریداری غٹ آن اہم ءِ، ہواوے نا کمک اٹ سالانہ مسہ لکھ پاکستانی طالب علم آتے انفارمیشن ٹیکنالوجی نا کسبی تربیت آن مکل انا آئی ٹی برآمد آک ودرہ۔ اوپارے کہ حکومت نئے بیرہ زالبول بلکن بلوچستان نا ورناتے اولیتی بنداوتیا دا ہیلکاری پروگرام نا بشخ اس جوڑ کیک، حکومت ہواوے تون پاکستان نا ڈیجیٹل اکانومی ٹی پائیدار شریداری ءِ قدر انا نظر اٹ ہرک۔ وزیراعظم پارے کہ ملک اٹی لائخ افرادی قوت نا سوگو بنداو اس جوڑ کننگ آن ڈیجیٹل اکانومی ءِ مون آدننگ مریک، خودکار ، پوسکن و ترند تر گورننس نا نظام نا نفاذ کن حکومتی ادارہ غاتاڈیجیٹائزیشن وخت انا اہم گرج ءِ۔ ڈل وزیراعظم ءِ پاکستان ہواوے نا نیام اٹ ڈیجیٹل پاکستان پروگرام کن کمکاری نا معاہدہ نا رداٹ برجاڈ ٹ آتا پیش رفت نا بابت حوال تس۔ حوال اٹی پاننگاکہ آئی ٹی نا تربیت کن پوسکن آ طرز انا میسیواوپن آن لائن کورسز سسٹم تیار کننگانے ہرادے صوبائی حکومت آتا کمک اٹ نافذ کننگک۔ ڈل پاکستان نا قومی کلاؤڈ سٹریٹجی تون ہم گرنچ نیشنل ڈیٹا سینٹراس جوڑ کننگ کن کمکاری نا پیش کش کرسا معلومدار کرے کہ نیشنل ڈیٹا سینٹر نا جوڑ کننگ آن گچین کلاؤڈ سروس آتا فراوانی پک مریک و کثیر زرمبادلہ بچفنگ مریک۔ ڈل پارے کہ اسلام آباد ءِ سمارٹ سٹی اس جوڑ کننگ کن ہواوے حکومت پاکستان تون شریداری نا خواہندار ءِ، اسلام آباد سمارٹ سٹی ڈٹ انا رداٹ ٹریفک، جان جوڑی و تعلیم نا خذمت ہلسا پارکنگ پین پین کون آ ایلو آسراتی ڈیجیٹل پلیٹ فارم آ میسر مریک۔ اوڑدہی ٹی وزیر مملکت آئی ٹی شزہ فاطمہ خواجہ، وزیراعظم ناکوآرڈی نیٹر رانا احسن افضل و تعلقدار بڑزکو آفیسر آک ہم ساڑی ئسر۔
