اسلام آباد۔ 19 جولائی (اے پی پی) وزیراعظم محمد شہباز شریف پارینے کہ پاکستان و عمان نا تعلقداری اسیجائی تاریخ، عقیدہ و دودوربیدہ غاتالان ءُ، اوپاکستان و عمان نا نیام اٹ چندی بشخ خاص وڑاٹ واپار، زرکاری، توانائی و دفاع ٹی ہڑتوم آ کنڈآتا کمکاری ءِ پین سوگو کننگ نا است خواہی نا درشانی ءِ کرینے۔ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف تون سلطنت عمان نا سفیر فہد سلیمان خلف الخروسی نا (اینو) جمعہ نادے آ وزیراعظم ہاؤس اسلام آباد اٹی اوڑدہی مس۔ وزیراعظم مسقط ناضلع وادی کبیر اٹی امام بارگاہ علی بن ابوطالب آ مروک آ بزدلانہ دہشت گرد جلہو نا ترندی اٹ مذمت ءِ کرے، ہراٹی چار پاکستانی شاری تتون اوار شش بندغ زوال و سی آن زیات ٹھپی مسنو، ہرافتیان کم وود غٹ پاکستانی ئسر۔ وزیراعظم جلہو اٹی شہید مروک آ پاکستانی تا میت آتا وطن آ واپسی و ٹھپی تا درمان کن عمان نا کنڈآن دمدستی گام گیج و پاکستانی سفارت خانہ تون کمکاری نا ستاءِ کرے۔ وزیراعظم عمان ءِ دہشت گردی نا عفریت تون مون تننگ کن پاکستان نا کمکاری نا سلاہ ءِ خلک۔ اوڑدہی ٹی وزیراعظم سلطان ہیثم بن طارق کن تینا نیک است خواہی نا درشانی ءِ کرے وخت اس کہ سلطان تون بھلا عئید و چنکاعئید انا وخت آ مروک آ ٹیل فون گپ وتران نا ہم ذکر ءِ کرے۔ وزیراعظم سلطان ہیثم بن طارق ءِ زوت آن زوت پاکستان نا سرکاری دورہ ءِ کننگ نا تینا تدوک آ کروک آ سلہ نا درشانی ءِ کرے۔ وزیراعظم پارے کہ پاکستان و عمان نا تعلقداری اسیجائی تاریخ، عقیدہ و دودوربیدہ غا تالان ءُ۔ اوپاکستان نا کنڈآن ہڑتوم آ ملک آتا نیام اٹ چندی بشخ خاص کر واپار، زرکاری، توانائی، و دفاع ٹی ہڑتوم آ کنڈآتا کمکاری ءِ پین سوگو کننگ نا است خواہی نا درشانی ءِ کرے۔ وزیراعظم واپار و زرکاری ٹی کمکاری کن ڈل ءِ بروک آہفتہ پاکستان نا دورہ ءِ کننگ نا رغامنگ آ سفیر نا منت واری ءِ ہرفے و اودے باوری کرفے کہ تعلقدار کمامدارآک تین پہ تینی وڑاٹ فائدہ ئی نیتجہ غاتا ہلنگ کن ڈل ءِ پورو کمکاری فراوان کینہ۔ عمان نا سفیر وزیراعظم نا منت واری ءِ ہرفے و عمان نا سلطان نا کنڈآن نیک است خواہی نا درشانی ءِ کرے۔ اوتینا ملک انا پاکستان تون واپاری و زرکاری نا تعلقداری تے پین ودفنگ نا است خواہی نا درشانی ءِ کرے۔
