اسلام آباد۔ 19 جولائی (اے پی پی) اسپیکر قومی اسمبلی سردار ایاز صادق پارے کہ پارلیمان والس اٹ خڑکی رابطہ غان ملک اٹی جمہوریت سوگو مریک، ینگ سٹیزن انٹرن شپ پروگرام نا سوب آن آخبت نا جوڑ کروک آتے پارلیمنٹ و اونا نظام کار آن آگاہی دوئی مریک۔ جمعہ نادے آ داڑے ینگ سٹیزن انٹرن شپ پروگرام نابشخ ہلوک آتیان تران کرسا اوپارے کہ پروگرام اٹی اوار غٹ چناتے پارلیمان اٹ بخیر اٹ پاوہ، قومی اسمبلی ٹی چناتا انٹرن شپ پروگرام نا بنداو 2014ٹی تخان، چناتا انٹرن شپ پروگرام کنا است آن بھاز خڑک ءِ ، چناتا روشن آخبت کن غٹ ممکن گام گیج کیوہ۔ اوپارے کہ خوشی ءِ کہ داپروگرام اٹی ملک انا غٹ علاقہ و تپہ غاتا نمائندگی ءِ، پارلیمان 25 کروڑ الس نا دانش گاہ ءِ۔ اوپارے کہ ینگ سٹیزن انٹرن شپ پروگرام ناسوب آن آخبت نا جوڑ کروک آتے پارلیمنٹ و اونا نظام کار آن آگاہی دوئی مریک، پارلیمان و الس اٹ خڑکی رابطہ غان ملک اٹی جمہوریت پین سوگو مریک، داہیت است جمی نا سوب ءِ کہ ملک انا آخبت رکھوک دوتیٹی ءِ۔ اوپارے کہ ملک انا شونداری کن المی ءِ کہ غٹ اواری اٹ کاریم کیر۔ اسپیکر قومی اسمبلی چناتے پروگرام اٹ پبی بشخ ہلنگ ءِ پک کننگ آ ہم زور شاغا۔
