اسلام آباد۔ 19 جولائی (اے پی پی) بنجائی وزیر داخلہ و انسداد منشیات محسن نقوی تون سری لنکا ناہائی کمشنر ایڈمرل (ر) رویندرا چندرا سری وے گونارتنے اوڑدہی کرے۔ ہراٹی تین پہ تینی است خواہی نا امور و سری لنکا ٹی کیہی سال آن بندپاکستانی شاری تا یلہ کننگ نا بابت گپ وتران کننگا۔ اوڑدہی ٹی تدوک آ کیہی سال آن سری لنکا ٹی اختہ پاکستانی بندی تے 7 دے ٹی پاکستان پدی اتنگ نا فیصلہ کننگا۔ سری لنکاٹی پاکستانی بندی تا وطن آ پدی بننگ کن ہڑتوم آ کنڈآن المی کارروائی زوت پورو کننگ آ امنا کننگا۔ سری لنکن ہائی کمشنر پاکستانی بندی تا رہائی کن تینا ہرممکن کمکاری نا باوری کرفے۔ بنجائی وزیر داخلہ محسن نقوی بندی تا وطن آ واپسی کن کمکاری آ سری لنکن ہائی کمشنر نا منت واری ءِ ہرفے۔ بنجائی وزیر داخلہ محسن نقوی پارے کہ سری لنکا ٹی بند پاکستانی شاری تا وطن آ واپسی کن غٹ گام گیج آتے زوت آن زوت گڈیکو دروشم اس تننگ انگ ءِ۔ اوڑدہی ٹی انسداد منشیات و بارڈر سیکورٹی نا امور آہم گپ وتران کننگا۔ بنجائی وزیر داخلہ پارےکہ سری لنکا و پاکستان نا نیام اٹ تعلقداری وخت اتون سوگو مسنے۔ تین پہ تینی تعلقداری ءِ پین مون آ ودفنگ کن ترندی اٹ گام گیج کننگ نا گرج ءِ۔ بنجائی وزیر داخلہ داہیت آ زور شاغسا پارینے کہ انسداد منشیات و بارڈر سیکورٹی نا بابت تین پہ تینی کمکاری ءِ مون آ دننگ وخت انا خواست ءِ۔ سری لنکن ہائی کمشنر پارے کہ سری لنکا پاکستان تون تینا تعلقداری تے بھاز اہمیت ایتک۔
