اسلام آباد۔ 19 جولائی (اے پی پی) 5 اگست ءِ ِ ’’یوم استحصال ‘‘نا وڑاٹ اڈتننگ نا بابت تیاری تا جاچ ءِ ہلنگ کن اسلام آباد اٹی اسہ بڑزکو کہولی دیوان اس اڈتننگا۔ نریندر مودی نا کماشی ٹی بھارتیہ جنتا پارٹی نا بھارتی حکومت 5 اگست 2019 آ اقوام متحدہ نا قرارداد و جہانی کانود نا پاش آن پاش خلاف ورزی ءِ کرسا بھارتی آئین نا دفعہ 370 ءِ منسوخ کرسا جموں وکشمیر نا خصوصی حیثیت ءِ چٹفیسس۔ کنٹرول لائن نا ہڑتوم آ کنڈ، پاکستان و مچ آ دنیا ٹی کشمیری مودی حکومت نا دا غیرکانودی گام انا برخلاف برانز ریکارڈ کرفنگ کن ہرسال 5 اگست ءِ ’’یوم استحصال ‘‘ نا وڑاٹ اڈایترہ۔ کشمیر میڈیا سروس نا رداٹ وزیراعظم نا کوآرڈی نیٹر امور کشمیر شبیر احمد عثمانی نا کماشی ٹی دیوان اٹی ایڈیشنل سیکرٹری امور کشمیر و گلگت بلتستان سید خالد گردیزی و وزارت نا ایلو بڑزکوکمامدارآک بشخ ہلکر۔ دیوان اٹی وزارت خارجہ، وزارت حوالکاری و شینکاری ، اسلام آباد پولیس ، وزارت انفارمیشن ٹیکنالوجی اینڈ ٹیلی کام ، کیپٹل ڈویلپمنٹ اتھارٹی، وزارت تعلیم، پاکستان ریلوائی، قومی میرات و دودوربیدہ ڈویژن، کنٹونمنٹ بورڈ اتون اوار چندی وزارت و محکمہ غاتا کمامدار و فوکل پرسن، ہرچار آ صوبہ غاتا بڑزکو کمامدار، اسلام آباد و راولپنڈی نا ضلعی انتظامیہ نا نمائندہ و ایلو کمامدارآک بشخ ہلکر۔ دیوان اٹی کل جماعتی حریت کانفرنس آزاد جموں وکشمیر شاخ انا راہشون الطاف حسین وانی ہم شریک ئس۔ دیوان اٹی چندی وزارت آتا نمائندہ غاک کوآرڈی نیٹر امور کشمیر ءِ تینا ادارہ غاتا کنڈآن کروک آ تیاری تا بابت حوال تسر۔ شبیر احمد عثمانی داوخت آ پارے کہ پاکستان بھارت نا غیرکانودی کوزہ ٹی جموں وکشمیر نا محکوم الس آمروک آ بھارتی ظلم انا برخلاف ہرفورم آ ہمووخت اسکان توار بڑزکرساکیک ہراتم اسکان کشمیری تے اوفتا ودی ئی حق ، حق خودارادیت ملیپک۔
