اسلام آباد۔ 19 جولائی (اے پی پی) بنجائی وزیر صنعت وپیدوار ، نیشنل فوڈ سیکورٹی اینڈ ریسرچ رانا تنویر حسین پارینے کہ خراج دُزی آن بچنگ کن کاٹن اینڈ جننگ انڈسٹری آ ٹریک اینڈ ٹریس سسٹم نافذ کننگ نا فیصلہ کننگانے۔ وزارت قومی غذائی رکھ و پٹ وپول آن جاری بیان نا رداٹ داخیال آتا درشانی ءِ او پاکستان کاٹن جنرز ایسوسی ایشن نا ڈل اتون گپ وتران کرسا کرے ہرا جمعہ نادے آ داڑے اوڑتون اوڑدہی کریر۔ اوڑدہی ٹی کرپاس نا بج و کاٹن سیڈ کیک آ زیات خراج نا باندات آ شرہ مس۔ رانا تنویرحسین پارے کہ کرپاس نا صنعت غٹ آن زیات روزگار فراوان کننگ نا لائخی تخک ، ملک انا خلقی زرگزران اٹ کرپاس نا صنعت نا غٹ آن بھلو کڑد اسے، خراج دُزی آن بچنگ کن ملک اٹی کرپاس نا گانٹھ نا پیدوار آ ٹریک اینڈ ٹریس سسٹم نافذ کننگک۔ اوپارے کہ صوبائی حکومت آتا کمک اٹ کاٹن کنٹرول ایکٹ ءِ حقی وڑاٹی نافذ کینہ، کاٹن سیڈ و کاٹن سیڈ کیک نا سیلز خراج اٹی جنرزآتے ریلیف تننگ نا سلاہ غا سجفنگک، پوسکن آ خراج آتا باندات فنانس ڈویژن و ایف بی آر ءِ سجفنگ کن گدریفنگک۔ کاٹن جنرز ایسوسی ایشن نا ڈل پارے کہ بھلا خراج آتیان کاٹن جننگ انڈسٹری نا پیدوار زہمی مننگ اٹی ءِ، ڈل انا پاننگ ئس کہ تدوک آ سیزن اٹی ملک اٹی 8.4 ملین پمبہ ناگانٹھ ودی مس، است بڈ پالیسی آن 20 ملین گانٹھ ودی کننگ مریک۔
