اسلام آباد۔ 19 جولائی (اے پی پی) بنجائی وزیر امور کشمیر و گلگت بلتستان و وزارت سیفران انجینئر امیر مقام پارینے کہ حق خودارادیت کن کشمیریک تدوک آ ہفت دہائی ٹی لکھ آ قربانی تے تسنو، اوفتا پاکستان تون تعلقداری بے مٹ ءِ، پاکستان آن کشمیری تا سوگو تعلقداری ءِ بھارت ہچ ءُ حالیت اسے ٹی چٹفنگ کپک ، شہید آتا سوز ہلالی بیرک اٹ جہہ جاگہ کشمیری تا پاکستان تون مہرومریبت نا پاش آن پاش درشانی ءِ۔ کشمیر نا یوم الحاق پاکستان نا بابت جمعہ نادے آ خصوصی کلہو اٹی بنجائی وزیر پارے کہ اینو ہی نا دے 19 جولائی 1947 آ غیرتی کشمیریک پاکستان تون الحاق کن سری نگراٹی قرارداد اس منظور کریر۔ انجینئر امیر مقام پارے کہ حق خودارادیت کن کشمیریک ہفت دہائی ٹی لکھ آ قربانی تے تسنو ، کشمیری تا پاکستان تون تعلقداری بے مٹ ءِ۔ وزیر امور کشمیر پارے کہ پاکستان تون کشمیری تا سوگو تعلقداری ءِ بھارت ہچ ءُ حالیت اسے ٹی چٹفنگ کپک، شہید آتا سوز ہلالی بیرک اٹ جہہ جاگہ کشمیری تا پاکستان تون مہرومریبت ناپاش آن پاش درشانی ءِ ۔ انجینئر امیر مقام پارے کہ کشمیری پاکستان نا بیرک ءِ مقبوضہ کشمیر نا ہرگلی و کوچہ غا چست کیرہ، حق خودارادیت و الحاق پاکستان کن کشمیری ورناک تینا باوہ و پیرہ غانبار سنبرینگوک ءُ۔ اوپارے کہ کشمیری تا حق خودارادیت نا عزم ءِ پرغنگ کن غٹ تر بھارتی چم آک بے سہب مریرہ۔ پاکستان دنیا نا غٹ فورم تیا کشمیری تا پبی مخ تفی ءِ برجاتخک۔
