کوئٹہ۔ 18جولائی (اے پی پی) پاکستان مسلم لیگ (ن) بلوچستان نا سینئر مرکزی راہشون چوہدری نعیم کریم بنوں کینٹ و رورل ہیلتھ سینٹر اٹی مروک آ دہشت گردی ٹی فوجی ورناتا شہیدی و ایلو واقعہ غاتیٹی شہید مروک آ بندغ آتا خاہوت آتون ڈکھیائی و است ہسونی نا درشانی ءِ کرینے۔ صوبائی رابطہ آفس آن جاری مروک اسہ بیان اسے ٹی اوپارے کہ داوخت آ پاکستان ءِ سیوت و سخا نا سخت گرج ءِ انتئے کہ پاکستان نا اصلی دشن خواپک کہ او اودےپرامن و شونداری نا کنڈآ ہنسا خنے غٹ پاکستانی تے مرے کہ اوتینا غٹ اختلاف آتے اسہ پلو تخسا پاکستان نا سلامتی و سوگوی کن کاریم کیر۔ اوپارے کہ دشمن خواہک کہ او تینا ناپاک عزم ءِ پوروی اسکان سرکے ولے پاکستان نا ساڑی حالیت آتا خواست ءِ کہ غٹ ءِ اسہ اسیجائی مسخت اسے نا رداٹ یکجا کننگ مرےننے مذہب، بولی، سیاست و فرقہ واریت آن ایڑترمرسا بیرہ پاکستان نا شونداری وشونہالی کن کاریم کروئی مریک۔ اوپارے کہ پاکستان مسلم لیگ (ن) نا کماشی ٹی، خاص کر نواز شریف و شہباز شریف مدام پاکستان نا گچینی و الس نا آسودہی کن کاریم کرساکرینو و ساڑی حالیت آتیٹی ہم ننے اوفتا نقش قدم آ چلینگسا سیوت و سخا ءِ مون دروئی مریک ۔ چوہدری نعیم کریم الس آن خواست کرے کہ او صبر و تحمل نا درشانی ءِ کیر و دہشت گردی کون آ واقعہ غاتا مقابلہ ءِ کننگ کن یکجامریر۔ اوپارے کہ دہشت گردی نادا واقعہ غاک نئے بیرہ پاکستان نا سلامتی کن خطرہ ءُ بلکن نناراجی پلان ءِ ہم نسخان ایترہ۔ اوپارے کہ ننے تینا فوج و سیکورٹی ادارہ غاتون سلوئی مریک و اوفتا قربانی تے قدر انا نظر اٹ ہروئی مریک اوفتا جیرت و قربانی تیان بیدس نن دا مشکل آتون مون تننگ کپنہ۔ اوپارے کہ داوخت آ پاکستان نا سوگوی و شونداری ننا غٹ انا اسیجائی زمواری ءِ ننے تینا جندی فائدہ غاتے پدپشت تخسا قومی فائدہ غاتے اولیت تروئی مریک داوخت ءِ کہ نن اسہ راج اس جوڑ مرسا چیلنج آتون مون ایتن و اسہ یکجا و سوگو پاکستان اس جوڑ کین۔ اوداہیت آ زور شاغا کہ ورناچین ءِ ہم مون آ برسا ملک انا شونداری ٹی تینا کڑد ءِ ادا کروئی مریک تعلیم و شعور نا کمک اٹ نن تینا ورناتے ملک انا آخبت نا جوڑ کروک جوڑ کننگ کینہ ننے تینا پوسکن آچین ءِ داسوب آن بچفوئی مریک ہرا ننا ملک ءِ نسخان ایترہ و اوفتے اسہ روشنا آخبت اسے نا کنڈآ دروئی مریک۔ اوپارے کہ انشاء اللہ پاکستان زوت داویل آتا مون ءِ تورک واسہ سوگو ءُ ملک اس جوڑمرسا مون آبریک ننے اللہ تعالیٰ غا بھروسہ تخسا تیناعمل اٹ پک کروئی مریک کہ نن اسہ عظیم ءُ قوم اسے اُن ہراہر چیلنج مون مون تننگ نا لائخی تخک۔ اودعاکرے کہ اللہ تعالیٰ ننا ملک ءِ ہروڑنا آفت آتیان رکھے و ننے ہمت و استقامت عطاکے تانکہ نن دا مشکل آتا مون ءِ توننگ کین و پاکستان ءِ شونداری و شونہالی نا کنڈآن دننگ کین۔
