اسلام آباد۔17جولائی (اے پی پی):پاکستان ءَ بنوں کنٹونمنٹ ءِ سر ء ناشرکاری ارش ءِ پدءَ اوگان ڈپٹی ہیڈ آ ف مشن ءَ را گوانک جنان ءَ اوگانستان ءَ گوں سک باز جاک ءُ کوکار ریکاٹ کنائینت۔ ناشرکاری ارش ءَ اوگانستان ءَ استیں حافظ گل بہادر گروپ دست مانجن انت۔ چار شمبے ءِ روچ ءَ درئی کارانی کارگس ءِ نیمگ ءَ جاڑی بوتگیں جار ءِ رد ءَ گوشگ بوتگ کہ اسلام آباد ءَ اوگانستان ءِ سفارتخانہ ءِ ڈپٹی ہیڈ آف مشن ءَ را وزارت ءِ درئی کار ءَ گوانک جنگ بوتگ۔ آئی ءَ را 15 جولائی 2024 ءَ بنوں کنٹونمنٹ ءِ سر ءَ بوتگیں ناشرکاری ارش ءِ پد ءَ پاکستان ءِ نیمگ ءَ چہ جاک ءُ کوکاری مسل ءِ دیگ بوتگ۔ ا ے ارش ء، ساھت ءَ 8 سیکورٹی کارندہ بیران بوتگ انت ءُ بازیں ٹپیگ بوتگ انت۔ ا ے ارش اوگانستان ءَ استیں حافظ گل بہادر گروپ ءِ نیمگ ءَ کنگ بوتگ۔ حافظ گل بہادر گروپ تحریک طالبان پاکستان ءِ گوما یکجائی ءَ پاکستان ءَ ناشرکاری ارش ءَ سدانی کساس ءَ سٹیزن ءُ کانود ءَ را مھکم داروکیں سیکورٹی کارندہ آنی مرگ ءِ زمہ وار انت۔ پاکستان ءَ اوگانستان ءَ ناشرکار آنی ٹھکانہ آنی است بوھگ ءِ ھوالگءَ نہ وشی ءِ درشان کت ءُ گوشت کہ ایشی ءَ چہ پاکستان ءِ سلامتی سک باز بیم ءُ ھوپ ءِ آماچ انت۔ ترجمان ءَ گوشت کہ اے رنگیں واکیہ ءَ چہ دوئیں براتیں ملک آنی نیام ءَ وت مہ وتی یکوئی سک باز آماچ بوتگ انت۔ ترجمان ءَ گوشت کہ بنوں کنٹونمنٹ ءِ سر ءَ ارش اے پڑ ءَ ایمنی ءُ سلامتی ءِ واستہ ناشرکاری ءِ ھوپ آنی یات ءَ گیج ائیت۔ ترجمان ءَ گوشت کہ پاکستان ناشرکاری ءِ ھلاپ ءَ جوانیں گامگیج کنگ ءِ لوٹ ءَ کنان ءَ پاکستان ءِ سلامتی ءِ ھلاپ ءَ توامیں بیم آں گوں گر ءُ چیل بوھگ ءِ جزم ءِ درشان ءَ کنت۔
