محرم الحرام اٹی عبادت گاہ، ماتمی جلوس، مجلس و مچی تا رکھی بست وبند آ ڈیوالئی  یا لاپرواہی ءِ سگنگ پننگک، گورنر بلوچستان جعفر خان مندوخیل

کوئٹہ۔ 15 جولائی (اے پی پی) گورنر بلوچستان جعفر خان مندوخیل پارے کہ محرم الحرام اٹی عبادت گاہ ، ماتمی جلوس، مجلس و مذہبی مچی تا رکھی بست وبند آتیا ڈیوالئی  یا لاپرواہی ءِ سگنگ پننگک، محرم الحرام اٹی الس نا جان و مال انا پورو رکھ انا خاطر غٹ کانود نافذ کروک آ ادارہ غاتا نیام اٹ سوگو و فعال رابطہ تخنگ نا سخت گرج ءِ انتئے کہ جان ومال انا رکھ حکومت نا زمواری ءِ۔ ساڑی آ حساسیت نا رداٹ صوبہ ٹی ہرجاگہ غا بالخصوص بے کچ حساس جاگہ و عبادت گاہ تیا سیکورٹی نا سخت بست وبند کننگے۔ تینا بیان اٹی گورنر بلوچستان داہیت آ زور شاغا کہ محرم الحرام نا ماتمی جلسہ و جلوس نا منتظمین آتون ہم کوآرڈی نیشن پین گچین کننگ المی ءِ۔ اوپارے کہ حکومت و الس ہڑتوم آتیا زمواری بیٹ مریک کہ او عبادت گاہ، جلسہ و جلوس نا کیبی شکبر بندغ آتیا سخت نظر تخر و پرامن حالیت آتے پک کننگ کن تینا بشخ انا کڑد ءِ ادا کیر۔ ہندا وڑ ہر ذی شعور بندغ نافرض مریک کہ او محرم الحرام اٹی پبی کمک فراوان کے ، اوپارے کہ ضلعی انتطامیہ و ایلو سیکورٹی ادارہ غاتا فول پروف سیکورٹی بست وبند آتیان دااومیت کننگ مریک کہ یوم عاشور ا بخیروعافیت اٹ ایسر مریک۔