اسلام آباد۔ 12 جولائی (اے پی پی) وزیر مملکت آئی ٹی وٹیلی کمیونیکیشن شزہ فاطمہ خواجہ تون قطر سائنس اینڈ ٹیکنالوجی پارک انا صدر ڈاکٹر جیک لاوجمعہ نادے آ اونا دفتراٹی اوڑدہی کرے۔ اوڑدہی ٹی تین پہ تینی است خواہی نا امور و سٹارٹ اپ ایکوسسٹم و انوویشن نا بابت سرجمی اٹ گپ وتران مس۔ اوڑدہی ٹی وزیر مملکت آئی ٹی ءِ قطر سائنس اینڈ ٹیکنالوجی پارک انا بابت سرجمی اٹ حوال تننگا۔ قطر سائنس اینڈ ٹیکنالوجی پارک انا صدر ڈاکٹر جیک لاو پارے کہ پاکستانی کمپنیک قطر اٹی تینا دفتر آتے جوڑ کیر، پاکستانی کمپنی تا قطر اٹی ساڑی گری اوفتے دے ٹک نیامی نا مارکیٹ آتسکان گچین رسینگ اٹ کمکار مریک۔ خوانہ کہ پاکستانی انٹرپرینیورز قطر اٹی برسا فاؤنڈیشن ٹیکنالوجی آ کاریم کیر۔ وزیر مملکت آئی ٹی شزہ فاطمہ پارے کہ ساڑی حکومت انٹرپرینیورشپ و انوویشن نا مون آ دننگ کن گام گیج کننگ ءِ، وزیراعظم پاکستان نا چکار ورناتا پوسکن آ ٹیکنالوجی ٹی ٹریننگ و اوفتاکاریم نا کچ ءِ ودفنگ آٹی ءِ، ننا ورناتیٹی بھاز انگا لائخیک اریر، پاکستان و قطر انا نیام اٹ اسٹارٹ اپس ایکسچینج پروگرام نابناءِ کننگ مریک، دا بابت اگنائٹ و قطر سائنس اینڈ ٹیکنالوجی پارک اواری اٹ کاریم کننگ کیرہ۔ اوپارے کہ دااہم ءِ کہ قطراٹی پاکستانی سٹوڈنٹ آتے قطر سائنس اینڈ ٹیکنالوجی پارک انا دورہ ءِ کرفنگے، پاکستان و قطر ٹیکنالوجی نا پڑاٹ اسہ ایلو نا آزموندہ غاتیان فائدہ ہرفنگ کیرہ۔ اوڑدہی ٹی ایڈیشنل سیکرٹری وزارت آئی ٹی عائشہ حمیراموریانی ئسک ہم ساڑی ئسر۔
