اسلام آباد۔ 12 جولائی (اے پی پی) بنجائی وزیر کانو د وانصاف اعظم نذیر تارڑ پارینے کہ مخصوص نشست آتا بابت سپریم کورٹ نا فیصلہ غان حکومت ءِ ہچ ءُ چیلنج اس مون تروک اف، حکومت تون 209 باسک آتا پیدوار گیشتری ساڑی ءِ، بظاہر عدالت آرٹیکل 51 و106 نا تشریح ءِ کننگ نا جاگہ غا اودے دُوارہ نوشتہ کرینے، دافیصلہ نا سوب آن بھاز انگا کانودی و آئینی ابہام ودکی مسنے، پی ٹی آئی ءِ ہمو ریلیف ملا ہرادے او خواتنے، بنجائی کابینہ نافیصلہ ن وزہمی سیاسی جماعت آتا سلابت ءِ مون آتخسا نظرثانی اپیل نا بارواٹی فیصلہ کننگک۔ جمعہ نادے آ سپریم کورٹ نا کنڈآن مخصوص نشست آتا بارواٹی فیصلہ غان پد نیوز کانفرنس آن تران کرسا بنجائی وزیر کانود پارے کہ فیصلہ غان کیہی کانودی وآئینی موشگافی و سوج آک ودی مسنو، آرٹیکل 51 نارداٹ مسہ دے انا شڑت انا انت مریک؟ تحریک انصاف نا آزاد باسک آتا موقف ئس کہ مخصوص نشست سنی اتحاد کونسل ءِ بایدے ملے، بظاہر عدالت آرٹیکل 51 و 106 نا تشریح نا جاگہ غا اودے دُوارہ نوشتہ کرینے، سپریم کورٹ نا فیصلہ نا مندرجہ غاتا جاچ ءِ ہلنگ اُن۔ اوپارےکہ مخصوص نشست آتا بابت کانود ساڑی ءِ، نشست سنی اتحاد کونسل ءِ ہِننگ کیرہ، کیس اٹی پی ٹی آئی تو فریق ہی الوکہ، تحریک انصاف نا آزاد باسک آک کٹنگ آن پد اسہ فورم اسے تون ہم رجوع کتور، سنی اتحاد کونسل غیرمسلم ءِ تیناباسک امنا کپک، ہنداسوب آن اونا منشور نا رداٹ اواوفتے اقلیتی نشست بایدے ملپ۔ اعظم نذیر تارڑ پارے کہ تحریک انصاف وخت اس ہم پاتنے کہ اونا جماعت ءِ مخصوص نشست تننگے، داعدالتی فیصلہ نا دنگ انا ہچ ءُ نظیر اس ملپننگءِ، دافیصلہ نا سوب آن بھاز انگا ابہام ودی مسنے، ظاہرءِ داڑآآئینی و کانودی چاہندار آتا سلاہ مون آ برسا کیک، سرجم فیصلہ بننگ اسکان پین سلاہ تننگ ممکن اف ۔ اوپارے کہ نظرثانی اپیل نا بارواٹی ای ذاتی وڑاٹ سلاہ تننگ کپرہ داباندات ءِ بنجائی کابینہ ٹی پیش کننگک اونا فیصلہ غان بیدس پاننگ کپرہ کہ نظرثانی اپیل دائر کننگک۔ بنجائی وزیرپارے کہ گچین عدالتی فیصلہ ہمومریک ہراڑآ لب کشائی مف، عدالتی فیصلہ نا سوب آن ابہام و سوج آک ودی مسنو۔ اسہ سوج اسے نا ورندی ٹی اوپارے کہ ای دا آئینی باندات ءِ سیاست تون گڈ مڈ کپرہ، حکومت تون 209 باسک آتا گیشتری ساڑی ءِ، بجٹ دیوان اٹی ہم حکومتی بنچ آتیٹی باسک آتا گیشتری ئس۔ کانودی چارہ جوئی نا بابت سوج انا ورندی ٹی اوپارےکہ سیاسی جماعت آتا سلابت اٹ نظرثانی اپیل و کانودی چارہ جوئی نا فیصلہ ءِ کننگک، سیاسی جماعت آک تینا تینا مجلس عاملہ ٹی تولسا ہم داباندات آتے ہریرہ۔ اوپارے کہ پی ٹی آئی ءِ ہموریلیف ملا ہرا دے او خواتویسس۔
