وزیراعظم نا خولم و ایلو فصل آتا پیدوار اٹی ودکی کن گچین گام گیج کننگ، ویٹ بورڈ اٹی بزغر، لینڈ انفارمیشن اینڈ مینجمنٹ سسٹم و سپارکو نا نمائندہ غاتے اوار کننگ، پاسکو نا نجکاری نالائحہ عمل اس تیار کننگ نا پارت

اسلام آباد۔ 12 جولائی (اے پی پی) وزیراعظم محمد شہباز شریف خولم و ایلو فصل آتا پیدوار اٹی ودکی کن گچین گام گیج کننگ، ویٹ بورڈ اٹی بزغر، لینڈ انفارمیشن اینڈ مینجمنٹ سسٹم و سپارکو نا نمائندہ غاتے اوار کننگ  و پاسکو نا نجکاری نا بابت لائحہ عمل اس تیار کننگ ناپارت کرینے۔ وزیراعظم آفس نا میڈیا ونگ آن جاری بیان نا رداٹ دا پارت آتے وزیراعظم جمعہ نادے آ تینا کماشی ٹی وزارت قومی غذائی رکھ و پٹ وپول و پاسکونا بابت اڈ ہلوک دیوان اٹی تس۔ دیوان اٹی بنجائی وزیر اقتصادی امور احمد خان چیمہ، بنجائی وزیر خزانہ و محصولات محمد اورنگزیب، بنجائی وزیر قومی غذائی رکھ وپٹ وپول رانا تنویر حسین، بنجائی وزیر حوالکاری و شینکاری عطاء اللہ تارڑ، وزیر مملکت خزانہ ومحصولات علی پرویز ملک ، ڈپٹی چیئرمین پلاننگ کمیشن جہانزیب خان، وزیراعظم نا کوآرڈینیٹر رانا احسان افضل و تعلقدار بڑزکو سرکاری آفیسر آک بشخ ہلکر۔ دیوان اٹی ویٹ(Wheat)  بورڈ انا ری اسٹرکچرنگ نا منظوری ءِ تننگا۔ وزیراعظم پارت کرے کہ خولم و ایلو فصل آتا پیدوار اٹی ودکی کن گچین گام گیج کننگے و ویٹ بورڈ اٹی بزغر آتا نمائندہ غاتے اوار کننگے۔ اوویٹ بورڈ اٹی لینڈ انفارمیشن اینڈ مینجمنٹ سسٹم و سپارکو نا نمائندہ غاتے اوار کننگ و پاسکو نا نجکاری نا بابت لائحہ عمل تیار کننگ نا ہم پارت کرے۔ وزیراعظم پرمان کرے کہ بنجائی حکومت نا خولم نا ہلنگ نا بابت گیگ بدل حکمت عملی اس ترتیب تننگے و دابابت گلگت بلتستان ، آزاد کشمیر تون اوار صوبائی حکومت و ایلو تعلقدار ادارہ غاتون سلابت کننگے۔ دیوان  ءِ ویٹ بورڈ نا ری اسٹرکچرنگ و ٹی ا و آرز، خولم و ایلو فصل آتا پیدوار ءِ ودفنگ و پاسکو ٹی اصلاحات نا بابت ہم حوال تننگا۔