اسلام آباد۔ 12 جولائی (اے پی پی) بنجائی وزیر صنعت و پیدوار و غذائی رکھ رانا تنویرحسین پارینے کہ پاکستان اسہ ہزار کشاری گریجویٹ ءِ بڑزکو تعلیم و تربیت کن چین آ گدریفک، تربیت کشت وکشار و خور انا رکھ اٹی خاص مہارت تا احاطہ ءِ کیک۔ داخیال آتا درشانی ءِ او جمعہ نادے آ منسٹر کونسلر، ایمبیسی آف پیپلزریپبلک آف چائنا ژوہینگ تیان تون اوڑدہی ٹی گپ وتران کرسا کرے۔ اوڑدہی نا مسخت پاکستانی کشاری گریجویٹ آتے چین آ گدریفنگ نا وڑوڈول ءِ گڈیکودروشم اس تننگ ئس، ہندا اسکالرشپ نا پڑو ءِ وزیراعظم پاکستان نا ساڑی آ دورہ ءِ چین اٹی کننگاسس۔ بنجائی وزیر پارے کہ اسکالرشپ نا بنداوی مسخت خور و کشاری بشخ آتیٹی پاکستانی گریجویٹ آتا لائخی و مہارت ءِ ودفنگ ءِ، طالب علم آتے پوسکن کشاری وڑوڈول و تکنیکی مہارت آتیان شپ کننگک۔ اوپارے کہ طالب علم آک چین اٹی کشت وکشار اٹی جدت و پوسکن پٹ وپول ہیل کیرہ، تربیت کشت وکشار و خور انا رکھ اٹی مخصوص مہارت آتا احاطہ ءِ کیک۔ رانا تنویرپارے کہ طالب علم آتے مچ آ پاکستان آن گچین کننگک، بلوچستان نا طالب علم آتے اولیت تننگک، کنفیوشس انسٹی ٹیوٹ کشاری یونیورسٹی فیصل آباد اسکالرشپ پروگرام ءِ نافذ کیک۔
