اسلام آباد۔ 12 جولائی (اے پی پی) اسپیکر قومی اسمبلی سردار ایاز صادق پارینے کہ پاکستان نا ہنگری تون متکن آ دوستانہ تعلقداری ءِ، پاکستان، ہنگری تون اوار غٹ سنگت ملک آتون تین پہ تینی تعلقداری تے پین ودفنگ نا خواہندار ءِ۔ قومی اسمبلی سیکرٹریٹ آن جاری بیان نا رداٹ داخیال آتا درشانی ءِ ہنگری نا سفیر بیلافیزیکاس تون گپ وتران کرسا کرے ہرا جمعہ نادے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری، پارلیمانی کمکاری آ گپ وتران کننگا۔ اسپیکر قومی اسمبلی پارے کہ پاکستان نا ہنگری تون متکن آ دوستانہ تعلقداری ءِ۔ پاکستان ہنگری تون اوار غٹ سنگت ملک آتون تین پہ تینی تعلقداری تے پین ودفنگ نا خواہندار ءِ۔ پارلیمانی سفارتکاری نا کمک اٹ ہڑتوم آملک آتا الس ءِ پین خڑک اتنگ مریک۔ اوپارے کہ پارلیمانی ڈل آتا ہن وبر و پاک۔ ہنگری پارلیمانی فرینڈ شپ گروپ نا کمک اٹ تین پہ تینی کمکاری ءِ مون آدننگ ملک۔ اسپیکر سردارایاز صادق تعلیم نا پڑاٹی ہنگری نا کمکاری نا ستاءِ کرے۔ سفیر اسپیکر نا ہنگری کن خیرخواہی و تعلقداری تے پین ودفنگ نا است خواہی نا منت واری نا درشانی ءِ کرے۔ ہنگری نا سفیر ہم پاکستان تون تینا تعلقداری و کمکاری ءِ پین ودفنگ نا است خواہی نا درشانی ءِ کرے۔ سفیر ہنگری نا اسپیکر نا کنڈآن اسپیکر قومی اسمبلی ءِ پارلیمانی ڈل اتون اوار دورہ نا سلہ نامہ اس ہم تس۔
