اسلام آباد۔ 11 جولائی (اے پی پی) اسپیکر قومی اسمبلی سردار ایاز صادق تون پنچ شنبے نادے آ پاکستان نا دورہ غا بروک جرمنی نا پارلیمانی ڈل اوڑدہی کرے ہراٹی ہڑتوم آ کنڈآتا تعلقداری آ است جمی و پین سوگو کننگ نا عزم انا درشانی ءِ کننگا۔ اسپیکر سردار ایاز صادق نا پاننگ ئس کہ پاکستان جرمنی تون تینا دوستانہ تعلقداری تے بھاز اہمیت ایتک۔ ہڑتوم آکنڈآتا تعلقداری تے پین سوگو کننگ کن پارلیمانی سفارتکاری بھاز اہمیت تخک۔ ہڑتوم آ سنگت ملک آتا نیام اٹ پارلیمانی ڈل تا ہن و بر و پارلیمانی فرینڈ شپ گروپ نا نیام اٹ رابطہ غاتا مون آ دننگ آن ہڑتوم آ کنڈآتا تعلقداری پین سوگو مریک۔ جرمنی، پاکستان نا انفرادی وڑاٹ و یورپ نا رداٹ اہم اقتصادی شریدار ءِ۔ سردار ایاز صادق پارے کہ پاکستان اٹ اقتصادی و راجی بشخ آتیٹی زرکاری نا بھلو وارخواہی اس ساڑی ءِ۔ جرمنی نا زرکارآک پاکستان اٹ زرکاری نا وارخواہی تیان پبی فائدہ دوئی کننگ کیرہ۔ جرمن ڈل اسپیکر قومی اسمبلی نا جرمنی کن خیرخواہی و تعلقداری تے پین ودفنگ نا است خواہی آ منت واری ءِ ہرفیر۔ جرمن پارلیمنٹ نا باسک آتا پاننگ ئس کہ جرمنی پاکستان تون تینا تعلقداری تے قدر انا نظراٹ ہرک۔ جرمنی نا پارلیمان و حکومت پاکستان نا پائیدار شونداری و شونہالی نا دوئی کننگ کن تینا کمکاری ءِ برجاتخرہ۔ جرمن پارلیمنٹ نا باسک آک اسپیکر قومی اسمبلی نا ہڑتوم آ ملک آتا پارلیمان تیٹی رابطہ غاتے پین مون آ دننگ نا سلا ہ آن امنا کریر۔
