اسلام آباد۔ 11 جولائی (اے پی پی) بنجائی وزیر ہاؤسنگ اینڈ ورکس میاں ریاض حسین پیرزادہ پارینے کہ بنجائی سرکاری ملازم آتے آب اٹ و اڑزاں ہنکین نا فراوانی اولیت ءِ، حکومت اڑزان ہنکینی آسراتی تا بہم رسینگ کن سنبرینگوک ءِ ، ملک اٹی سرکاری بشخ انا پین ہنکینی ڈٹ بناکننگ نا سخت گرج ءِ، تانکہ ہر اسٹ ءِ تینا چھت دوبننگ کے، سرکاری ہنکینی ڈٹ آتیٹی زیات آن زیات شجرکاری ءِ مون آ دننگے۔ داخیال آتا درشانی ءِ او پنچ شنبے نادے آ پی ایچ اے فاؤنڈیشن نا ہاؤسنگ پروجیکٹ 1-16/3اٹی تیار اپارٹمنٹ آتا چابی الاٹی تا دوٹی تننگ نادود آن بطور مہمان خاص تران کرساکرے۔ میاں ریاض حسین پیرزادہ داکان مست الاٹی تا دوٹی تروک آ اپارٹمنٹ آتا دورہ ءِ ہم کرے، و ڈٹ انا سرسہب پوروی آ پی ایچ اے فاؤنڈیشن کمامدارآتا ستا ءِ کرے وخت اس کہ آب اٹ کاریم آ ڈائریکٹرپروجیکٹ نا خذمت آتا ستاءِ کرے۔ اوپی ایچ اے فاؤنڈیشن کمامدارآتے پارت کرے کہ کم کٹیا والا بندغ آتیکن مچ آملک اٹی پین ڈٹ آتا بنا ءِ کننگے۔ میڈیا تون گپ وتران کرسا اوپارےکہ سرکاری ہنکینی ڈٹ آتیٹی غٹ تر آسراتی تا بہم رسینگ ءِ پک ککننگک و تعمیراتی آب آ ہچ وڑنا سمجھوتہ کننگپک۔ داوخت آ چیف ایگزیکٹیو آفیسر پی ایچ اے فاؤنڈیشن شاہد حسین بنجائی وزیر ءِ 117 ایکڑ آ تالان کثیر المنزلہ ہنکینی ڈٹ آتا بارواٹ سرجم حوال تس و پارےکہ دا ڈٹ اٹی بنجائی ملازم و لس شاری تیکن جم وڑاٹ 672 بی ٹائپ و 912 ٹائپ اپارٹمنٹ ءُ ڈٹ اٹی 51 شاپ آتیا تالان کمرشل بلاک ہم اوار ءِ ۔ ڈٹ اٹی ٹیو ب ویل پورو مسنے و بجلی و دیر انا فراوانی نا بناءِ کننگانے۔ داہنکینی ڈٹ فروری 2023 اٹی ایسر اسکان سرمس، اوکان پد 1416 بی و ای ٹائپ نا آفر کننگاسس۔ اوپارے کہ 1063 اپارٹمنٹ مالک آتا دُوٹی تننگانے وخت اس کہ 33 خاہوت پوسکن آ اپارٹمنٹ آتیٹی ہنکین ہم اختیار کرینو۔ کمرشل بلاک نا 23 دوکان تا نیلامی مسنے و مالک آتے کوزہ تننگ انگ ءِ۔ بنجائی وزیر ہاؤسنگ اینڈ ورکس میاں ریاض حسین پیرزادہ داوخت آ الاٹی تے مبارکبادی تس و اوفتے تون گپ وتران کرسا اوفتا گڑتی تے ہم بِنگ۔ میاں ریاض حسین پیرزادہ الاٹی تا گڑتی تیا پی ایچ اے فاؤنڈیشن کمامدارآتے پارت کرے ڈٹ اٹی غٹ آسراتی تا بہم رسینگ ءِ پک کننگے و سیکورٹی نا خاطر خواہ نظام اس تینا کننگے۔ بنجائی وزیر قدرتی حسن ءِ برقرارتخنگ و چاگڑدی ویل آتیان خلاصی کن ڈٹ اٹی شجرکاری نا گرج آ ہم زور شاغا۔ اوداپارت ہم کرے کہ الاٹی تا تین پہ تینی سلابت اٹ غٹ ویل آتا ایسرا س کشنگے تانکہ الاٹی تے اسہ بڑزکو آب انا ہنکینی آسراتی آن فائدہ مرے۔
