بنجائی حکومت کرپاس نا صنعت ءِ مون آ دننگ کن ہرممکن گام گیج کننگ اٹی ءِ، ٹیکسٹائل انڈسٹری نا مون آ دننگ کرپاس نا گچین پیدوار تون گنڈوک ءِ، رانا تنویر حسین

اسلام آباد۔ 11 جولائی (اے پی پی) بنجائی وزیر وزارت صنعت و پیدوار و نیشنل فوڈ سیکورٹی اینڈ ریسرچ رانا تنویرحسین خان پارینے کہ بنجائی حکومت کرپاس نا صنعت ءِ مون آ دننگ کن ہرممکن گام گیج  کننگ اٹی ءِ، ٹیکسٹائل انڈسٹری نا مون آ دننگ کرپاس نا گچین پیدوار تون گنڈوک ءِ۔ داخیال آتا درشانی ءِ او تینا کماشی ٹی پاکستان سینٹرل کاٹن کمیٹی نا گورننگ باڈی نا دیوان اٹی گپ وتران کرساکرے۔ بنجائی وزیر پارے کہ بنجائی حکومت کرپاس نا صنعت نا مون آدننگ کن ہرممکن گام گیج کننگ اٹی ءِ۔ پاکستان نا زرگزران کن کرپاس ناسالانہ گچین پیدوار اہمیت تخک۔ اوپارے کہ ٹیکسٹائل انڈسٹری نامون آ دننگ کرپاس نا گچین پیدوار تون گنڈوک ءِ۔ ٹیکسٹائل انڈسٹری کن بجلی نا فی یونٹ نہاد اٹی 10 روپئی نا کمتی کننگانے۔ بجلی نا نہاد کم مننگ آن انڈسٹری نا مشکل آتیٹی بھلو حداسسکان کمتی بریک۔ کرپاس نا پیدوار اٹی ودکی کن ریسرچ اینڈ ڈویلپمنٹ چکار کروئی مریک۔ اوپارےکہ حکومت بزغر، جنرز و ایلو اسٹیک ہولڈر آتے ہرممکن کمک فراوان کیک۔ کرپاس نا ساڑی آ سالانہ پیدوار 8.4 ملین گانٹھ ءُ ہرافتے برجامالی سال اٹی 15 ملین گانٹھ اسکان ودفنگ کن کوشست کننگ انگ ءِ۔ پوسکن آ کشاری وڑوڈول و ٹیکنالوجی آن فی ایکڑ پیدوار اٹی ودکی کننگ مریک۔ وزارت نیشنل فوڈ سیکورٹی اینڈ ریسرچ نا ترجمان نا رداٹ فوڈ اینڈ ایگریکلچرل آرگنائزیشن نا سلاہ و سوج آتے مون آ تخسا پی سی سی سی ناتنظیم نو کن سلاہ و سوج بٹنگ انگانے۔ ترجمان نا رداٹ پاکستان سینٹرل کاٹن کمیٹی نادیوان بروک آ ہفتہ دُوارہ مریک۔