اسلام آباد۔ 11 جولائی (اے پی پی) اسپیکر قومی اسمبلی سردار ایاز صادق نا کماشی ٹی پاکستان انسٹیٹیوٹ فار پارلیمنٹری سروسز(پیپس) نا بورڈ آف گورنرز نا دیوان پنچ شنبے نادے آ مس۔ دیوان اٹی ادارہ نا مالی و انتظامی امورنا بابت گپ وتران کننگا۔ داوخت آ اسپیکر پارے کہ پپس نا جوڑکننگ نا مسخت پارلیمان ءِ کانودی و ٹیکنیکل باندات آتیٹی کمک فراوان کننگ ءِ۔ گچین السی کانود سازی نا ملکی اولیت و شونداری تون بھلو تعلق اسے۔ قومی و صوبائی کانود ساز ادارہ غاتیٹی کمکاری ءِ مون آ دننگ بھاز اہمیت تخک۔ شفافیت ءِ برقرار تخنگ و پرفارمنس ءِ گچین کننگ کن ادارہ غاتا تھرڈ پارٹی فنانشل و پرفارمنس آڈٹ کرفنگک۔ اسپیکرپارے کہ دیوان اٹی آزاد جموں و کشمیر اسمبلی و گلگت بلتستان اسمبلی نا اسپیکر آتے ہم گورننگ بورڈ انا آخبت ممبر جوڑ کننگ نا بابت ہم گپ وتران کننگا۔ دیوان اٹی پنجاب اسمبلی نا اسپیکر ملک محمد احمد خان، سندھ اسمبلی نا اسپیکر اویس قادر شاہ، بلوچستان اسمبلی نا اسپیکر عبدالخالق خان ، خیبرپختونخوا اسمبلی نا اسپیکر بابر سلیم سواتی، آزاد جموں و کشمیر اسمبلی نا اسپیکر چوہدری لطیف اکبر و گلگت بلتستان اسمبلی نا اسپیکر نذیر احمد آن بیدس پارلیمنٹ نا باسک مولانا عبدالغفور حیدری، بلال اظہر کیانی، وجیہہ قمر، خورشیداحمد جونیجو، مہتاب اکبرراشدی، زرتاج گل و سید امین الحق ئسک بشخ ہلکر۔
