اسلام آباد۔ 11 جولائی (اے پی پی) وزیراعظم محمد شہباز شریف پارے کہ دانش اسکول نا دنگ ءِ ودفنگک، مشکل حالیت آتیٹی ہم گچین کارکڑد نا درشانی ءِ کروک آ ورناک سفت نا قابل ءُ۔ داخیال آتا درشانی ءِ وزیراعظم دانش اسکول نا طالب علم محمد آیان کاشف تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ داوخت آ بنجائی وزیر حوالکاری و شینکاری عطاء اللہ تارڑ، وزیراعظم یوتھ پروگرام نا چیئرمین رانا مشہود احمد خان ، تعلقدار کمامدار و آیان کاشف نا لمہ و بلہ ہم ساڑی ئسر۔ وزیراعظم آیان کاشف و اونا خاہوتءِ انٹرمیڈیٹ و سکینڈری ایجوکیشن بورڈ لاہور اٹی اول پوزیشن دوئی کننگ آ مبارکبادی تس۔ وزیراعظم پارے کہ درو ہراتم اودے معلوم مس کہ دانش اسکول نا طالب علم پوزیشن ہلکنے تو اودے بھاز خوشی مس۔ آیان کاشف باوہ نا سیخاغان محروم مسوسس اونا بلہ و لمہ اونا پرورش و تعلیم و تربیت نا زمواری ءِ ہرفیر۔ وزیراعظم پارے کہ اوورنامار و مسنک ہرا مشکل حالیت آتیٹی تعلیم ءِ برجاتخرہ او خاص وڑاٹ مبارکباد نا حقدار ءُ۔ وزیراعظم پارے کہ داوڑنا ورناک قوم انا آخبت و روشنااستارک ءُ۔ آیان کاشف وزیراعظم نا منت واری ءِ ہرفسا پارے کہ دانش اسکول شہباز شریف ناوژن ئس و اینو کنا سرسہبی نا سہرا دانش اسکول نا کاٹم ءِ۔ وزیراعظم پارے کہ دانش اسکول آتے پاکستان نا ایلو علاقہ غاتیٹی ہم جوڑ کننگک۔ بلوچستان اٹی 4 دانش اسکول ملنگ انگ ءِ۔ گلگت بلتستان، آزاد کشمیر، اسلام آباد ، خلقی علاقہ غاتیٹی دانش اسکول ملنگک۔ دااسکول آک ننکن گمر نا سوب ءُ۔ وزیراعظم پارےے کہ ہموچناک ہرا لمہ یا باوہ یاہڑتوم آتا سیخاآن محروم یا نزور مالی حالیت آتا سوب تعلیم ءِ برجاتخنگ کپسہ اودانش اسکول آتیٹی تعلیم ءِ برجاتخنگ کیرہ۔ آیان کاشف وزیراعظم نا اَرفنگ آپارے کہ دانش اسکول اٹی اودے ہنکین ، یونیفارم ، کن و خور تون اوار غٹ گچین آسراتی دوئی ءِ۔ وزیراعظم پارے کہ او اللہ تعالیٰ نا شکر ءِ ادا کیک ہراننے دااسکول جوڑ کننگ نا توفیق تس۔ کنے دا گڑابھاز تکلیف ایتک کہ ایچی سن کالج کون آ تعلیمی ادارہ غاتا درگہ نیزگار چناتیکن ملنگپسہ و دا تعلیمی ادارہ غاتیٹی بیرہ متمول ، زمیندار و بھلا خاہوت آتا چناک ہی خواننگ کیرہ۔ غریب نا چنا داوڑنا کالج اٹی داخلہ ہلنگ نا سجفنگ ہم کپک۔ ہموکان کنے ٹی دانش اسکول نا جوڑ کننگ نا سوچ ودی مس ہرا پورو مس۔
وزیراعظم آیان کاشف ءِ میڈیل اس بیرفسا پارےے کہ پاکستان نا شونداری نا کنجی ہشار آ طالب علم آتا دوٹی ءِ ۔ نن تینا ورناتے چندی فن و کسب نا تربیت تننگ کن گام گیج کننگ اُن تانکہ دا ورناتے کشت وکشار، صنعت، آئی ٹی تون اوار چندی بشخ آتیٹی روزگار نا گچین وارخواہی دوئی مننگ کے۔ وزیراعظم پارے کہ صنعت و حرفت و کشت وکشار نا شونداری و پیدوار ءِ ودفنگ کن باصلاحیت ورناتا کھیپ تیار کننگ ننا زمواری ءِ۔ آیان کاشف وزیراعظم تون دااست خواہی نا درشانی ءِ کرے کہ دانش اسکول آتے یونیورسٹی اسکان شون تننگے۔ وزیراعظم پارے کہ او دا چرجوئی ٹی وزیراعلیٰ پنجاب مریم نواز تون ہیت ککیک، دا جوان ءُ سلاہ اسے۔ وزیراعظم پارے کہ اسلام آباد اٹی دانش اسکول کن ڈغار و فنڈ جتا مسنے۔ بلوچستان، مسکوہی فاٹا، آزاد کشمیر و گلگت بلتستان اٹی ہم بھاز زوت دانش اسکول جوڑ مریک تانکہ ہموچناک ہرافتے تون وسیلہ اف اف اوفتے گچین تعلیمی آسراتی فراوان مننگ کے۔ آیان کاشف نا لمہ پارے کہ او تینا چنانا سرسہبی آن بھاز خوش ءِ۔ کنا مار ءِ دانش اسکول نا سوب آن تعلیم نا موقع ملا۔ دانش اسکول آتا استاد آتا اخس کہ ستاءِ کننگے کم ءِ۔ وزیراعظم پارے کہ ای دانش اسکول آتیکن گچین استاد آتا خذمت دوئی کننگ نا پارت کریسٹ۔ زیات تنخواہ تیا استاد آتاخذمت دوئی کننگ آ برانز ہم مس ولے ای پاریٹ کہ نیزگار چناتے ہم ایچی سن کالج، لارنس کالج، گرائمر ، کانونٹ و زیات فیس والا پرائیویٹ اسکول کون آ تعلیمی آسراتی والا اسکول اٹی خواننگ نا حق دوئی ءِ۔ وزیراعظم پارے کہ کنے خوشی ءِ کہ وزیراعلیٰ پنجاب مریم نواز کنا وژن ءِ مون آ دننگ ءِ۔ وزیراعظم آیان کاشف نا است بڈی ءِ کننگ کن اودے 10 لکھ روپئی نا چیک اس و لیپ ٹاپ اس تس و پنت وشون کرے کہ ہندا خواری، جوزہ و لگن اٹ مون آ کائے و قوم انا جوڑکروک آ جوڑمرے۔
