اسلام آباد۔ 11 جولائی (اے پی پی) وزیراعظم محمد شہباز شریف پارینے کہ فیڈرل بورڈ آف ریونیو ٹی اصلاحات و پورو ڈیجیٹائزیشن ننا زرگزرانی بقانا ویل ءِ، غٹ پورٹ آتیا کسٹم آپریشن تے شفاف وکرپشن فری کننگ نا بابت پبی گام گیج کننگے، صنعت و مصنوعات آتے رکھ تننگ کن انڈرانوائسنگ ءِ چٹفنگے، کسٹم ڈیوٹی نا پبی نفاذ کن پوسکن آ ٹیکنالوجی، مصنوعی ذہانت و ازباب آتے کاریم اٹ اتنگے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم تینا کماشی ٹی پاکستان کسٹم و فیڈرل بورڈ آف ریونیو نا امور نا بابت دیوان اٹی کرے۔ دیوان اٹی بنجائی وزیر اقتصادی امور احد خان چیمہ ، بنجائی وزیر خزانہ و محصولات محمد اورنگزیب، وزیرمملکت خزانہ و محصولات علی پرویز ملک ، ڈپٹی چیئرمین پلاننگ کمیشن جہانزیب خان، اٹارنی جنرل منصور اعوان، وزیراعظم نا کوآرڈی نیٹر رانا احسان افضل ، قومی اسمبلی نا باسک بیرسٹر عقیل ملک، چیئرمین ایف بی آر زبیر ٹوانہ و تعلقدار بڑزکو سرکاری آفیسر آک بشخ ہلکر۔ وزیراعظم محمد شہباز شریف پارے کہ کسٹم نا بشخ پاکستان نا زرگزران اٹی تمبہ نا حیثیت تخک۔ فیڈرل بورڈ آف ریونیو ٹی اصلاحات و پورو ڈیجیٹائزیشن ننا زرگزرانی بقانا ویل ءِ۔ وزیراعظم پارت کرے کہ ایف بی آر و ایلو ادارہ غاتیٹی برجا اصلاحاتی ڈٹ آتا تھرڈ پارٹی آڈٹ ہر کہول آ پک کننگے۔ فیڈرل بورڈ آف ریونیو ٹی برجاغٹ اصلاحات و ڈیجیٹائزیشن نا غٹ ڈٹ آتے اسہ چھتری نا کیرغ اتنگے۔ ایف بی آر انفورسمنٹ نا نظام ءِ گچین کرسا محصولات آتیٹی ودکی ءِ پک کے۔ پاکستان نا غٹ پورٹ آتیا کسٹم آپریشن تے شفاف و کرپشن فری کننگ نا بابت پبی گام گیج کننگے۔ وزیراعظم پارت کرے کہ کسٹم آپریشن تیٹی بروک غٹ اڑاند آتے مرکننگے۔ کسٹم ڈیوٹی نا پبی نفاذ کن پوسکن آ ٹیکنالوجی، مصنوعی ذہانت و ازباب آتے کاریم اٹ اتنگے۔ کسٹم نا نظام اٹی اصلاحات نا بابت برجاڈ ٹ آتیکن پروجیکٹ مینجمنٹ یونٹ ءِ دمدستی جوڑ کننگے۔ مس انوائسنگ نا بابت غٹ تر ویل آتے ایسر کننگے۔ پاکستان نا صنعت و مصنوعات آتے رکھ تننگ کن انڈرانوائسنگ ءِ چٹفنگے۔ وزیراعظم پارت کرے کہ انفورسمنٹ نا کمک اٹ اخس ریونیو یکجامس، اوفتا سرججم آتیان معلومدار کننگے۔ شپنگ نا بشخ اناآپریشن تا بابت ریگولیٹری فریم ورک اس جوڑ کننگے۔ کسٹم نا ویب بیسڈون کسٹمز سسٹم نا تھرڈ پارٹی آڈٹ کرفنگے۔ دیوان پاکستان کسٹم نا امور و اصلاحات آ حوال تننگا۔ حوال اٹی پاننگاکہ پاکستان کسٹم نا باندات آتے پورو وڑاٹ خودکار نظام آ گدریفنگانے۔ کسٹم نظام اٹی اصلاحات کن جہانی آب انا چاہندار آتا خذمت دوئی کننگانے۔ دااصلاحات نا کمک اٹ پوسکن آسسٹم اتنگک ہرا پوسکن آ مصنوعی ذہانت آ تالان مریک۔ 2023-24اٹی درآمد و برآمد آتا 72.4 درسد بشخ گرین چینل آن کلیئر کننگا۔ جولائی 2023 آن جون 2024 اسکان پاکستان کسٹم ویلیو ایشن کنٹرولز نا کمک اٹ 240 ارب روپئی نا ودکی ریونیو دوئی کرے ہرا تدوک آ سال آن 80 درسد زیات ءِ۔
