چینی شاری تا رکھ آ ڈیوالئی ءِ سگپنہ، بنجائی وزیر داخلہ محسن نقوی

اسلام آباد۔ 10 جولائی (اے پی پی) بنجائی وزیر داخلہ محسن نقوی پارینے کہ چینی شاری تا رکھ آ سمجھوتہ یا ڈیوالئی ءِ سگپنہ، تعلقدار ادارہ غاک تین پہ تینی کمک اٹ  پوسکن آ ایس او پی تیا سد درسد عملدرآمد ءِ پک کیر۔ داخیال آتا درشانی ءِ او چارشنبے نادے آ چینی شاری تا سیکورٹی نا بابت کور کمیٹی نا دیوان آن تران کرساکرے۔ دیوان اٹی بنجائی  سیکرٹری داخلہ، سیکرٹری دفاع، انچارج نیشنل کوآرڈی نیٹر نیکٹا، کوآرڈینیٹر نیشنل ایکشن پلان و کانود نافذ کروک آ ادارہ غاتا بڑزکو کمامدارآک بشخ ہلکر وخت اس کہ غٹ صوبہ، آزاد کشمیر  وگلگت بلتستان نا چیف سیکرٹری، آئی جیز پولیس و سیکرٹریز داخلہ ویڈیو لنک انا کمک اٹ دیوان اٹی بشخ ہلکر۔ دیوان اٹی مچ آملک اٹی چینی شاری تا سیکورٹی نا سرجمی اٹ جاچ ءِ ہلنگا۔ دیوان آن تران کرسا وزیرداخلہ پارے کہ چینی شاری تا رکھ آ ہچ ءُ سجھوتہ یا ڈیوالئی ءِ سگنگ پننگک، چینی شاری تا بابت سیکورٹی آڈٹ ءِ تخوک آ ٹائم لائن نا تہہ ٹی پک کننگے، تعلقدار ادارہ غاک تین پہ تینی کمکاری اٹ پوسکن آ ایس اوپی تیا سد درسد عملدرآمد ءِ پک کیر۔ اوپارے کہ چینی شاری تا سیکورٹی نا ایس اوپی تے غٹ تعلقدار ادارہ غاتا سلابت اٹ تیار کننگانے، وس اسکان کوشست کننگانے کہ داایس او پی تیٹی سیکورٹی نا غٹ پلو آتے مون آ تخنگے، فیلڈ اٹی کاریم کروک آ ادارہ غاک مستی سلاہ و سوج آتیان ہم معلومدار کیر۔ محسن نقوی پارے کہ کور کمیٹی دا سلاہ و سوج آتا جاچ  ءِ ہلیک، اگہ جاگہ اس ہم گچینی نا گنجائشت مس تو او سلاہ وسوج آتیا عملدرآمد ءِ پک کننگک۔ چیف سیکرٹریز و آئی جیز پولیس دیوان ءِ چینی شاری تا رکھ انا چرجوئی ٹی کروک آ گام گیج آتا بابت معلومدار کریر