اسلام آباد۔ 10 جولائی (اے پی پی) اسپیکر قومی اسمبلی سردار ایاز صادق سویلی وزیرستان اٹی دہشت گرد آتا برخلاف آپریشن اٹی اسہ ایلو آ سم کاری ٹی سیکورٹی فورس آتا مسہ ورناتا نہادی جون تا نسخان آ ڈکھیائی و است ہسونی نا درشانی ءِ کرینے۔ قومی اسمبلی سیکرٹریٹ آن جاری بیان نا رداٹ اسپیکر سپاہی اسداللہ، سپاہی محمد سفیان و زین علی ءِ دہشت گرد آتا بہادری اٹ مقابلہ ءِ کرسا شہیدی نا جام ءِ کُننگ آ خراج عقیدت پیش کرے و شہید آتا خاہوت آتون ہڑزخواہی نا درشانی ءِ کرینے۔ اسپیکر قومی اسمبلی پارے کہ ڈکھیائی و غم انا ساہت اٹ شہید آتا خاہوت نا غم و صدمہ ٹی بریبرنا شریک اُٹ۔ وطن نا دفاع نا خاطر جون تے ندر کروک آتا دترزیان مفک۔تینا اینو ءِ قوم انا آخبت آ قربان کروک آتا قربانی تے اسُل است آن دننگ مفک۔ اوپارے کہ دہشت گرد آک تینا ناپاک کارروائی تا کمک اٹ سیکورٹی فورس آتا دہشت گردآتا برخلاف جنگ انا بدل مفروک عزم ءِ بدل کننگ کپسہ۔ ملک دشمن شرپسند زموار آک دہشت گرد انہ کارروائی تا کمک اٹ ملک انا امن ءِ لتاڑنگ اٹ لگوک ءُ۔ مچ آ قوم دہشت گردی نا چٹفنگ کن تینا سیکورٹی ادارہ غاتون سلوک ءُ۔ اسپیکر اللہ تعالیٰ آن شہید آتا درجہ غاتا بڑزی و خاہوت کن صبر وجمیل نا دعاکرے۔ داکان بیدس ڈپٹی اسپیکر قومی اسمبلی سید میر غلام مصطفیٰ شاہ ناہم سویلی وزیرستان اٹی سیکورٹی فورس آتا مسہ ورناتا شہیدی آ است ہسونی نا درشانی ءِ کرسا شہید آتاخاہوت آتون ہڑزخواہی و ہمدردی نا درشانی ءِ کرے۔ اوپارے کہ مچ آ قوم دہشت گردی نا برخلاف متحد ءِ، ننا بہادر گل زادہ غاتا بے مٹ قربانیک زیان مفسہ۔ سیکورٹی فورس آتا نرزور ورناک ملک آن دہشت گردی ءِ چٹفنگ نا عزم کرینو۔ دہشت گرد آتا لغور انگا کارروائی سیکورٹی فورس آتا دہشت گردی نا چٹفنگ نا عزم ءِ بدل کننگ کپسہ۔ ڈپٹی اسپیکر شہید آتا درجہ غاتا بڑزی و غمزدہ خاہوت آتیکن صبر وجمیل نا دعاکرے۔
