اسلام آباد۔ 09 جولائی (اے پی پی) وزیراعظم نا کوآرڈی نیٹر موسمیاتی بدلی و چاگڑدی رابطہ رومینہ خورشید عالم دیوسائی نیشنل پارک نا چاگڑدی نظام نا رکھ اکن ویسٹ مینجمنٹ نا سوگو حکمت عملی نا بست وبند نا گرج آ زور شاغانے۔ داخیال آتا درشانی ءِ او مسکوہی سینیٹر و وائلڈ لائف نا اعزازی سفیر سردار محمد جمال خان لغاری تون اوڑدہی ٹی کرے ہرا سے شنبے نادے آ اوڑتون اوڑدہی کرے۔ وزیراعظم نا کوآرڈی نیٹر دیوسائی نیشنل پارک ءِ زہمی کروک آ اہم ویل آتا ذکر ءِ کرے ہراسیل وسواتی تا بننگ نا نتیجہ ٹی ٹھوس فضلہ نا ساڑی گری و دیوسائی نیشنل پارک نا بست وبند کن وسیلہ غاک گنج اس افس۔ اوپارے کہ کچرہ غاتا انتظام نا جوان ڈٹ انا کمتی نا سوب آن پارک انا چاگڑدی نظام خطرہ ٹی ءِ۔ رومینہ خورشید عالم تعلقدار کمامدارآتیا زور شاغا کہ او دیوسائی نیشنل پارک ءِ مون تروک چیلنج آتون مون تننگ کن ویسٹ مینجمنٹ نا سوگو حکمت عملی آ عملدرآمد کیر۔ اوپارے کہ کچرہ نا انتظام نا اسہ ڈٹ بند نظام نئے بیرہ پارک انا حیاتیاتی تنوع نا رکھ ءِ کیک بلکن پائیدار سیل و سوات ءِ ہم مون آ دننگ تون اوار اوار ہندی کمیونٹی نا کمک ءِ کیک۔ اوپارے کہ چاگڑدی چیلنج اتون مون تننگ کن پارک اٹی ڈسپوز ایبل پلاسٹک نا گڑاتیا پابندی خلنگ و سیل و سواتی تیٹی بیداری ودی کننگ نا گرج ءِ۔
