اسلام آباد۔ 09 جولائی (اے پی پی) وزیراعظم محمد شہباز شریف پارینے کہ حکومت زرگزرانی بحالی کن گچین گام گیج کننگ اٹی ءِ، سرکاری ملکیتی ادارہ غاتا نجکاری ءِ کننگ انگ ءِ، حکومتی خڑچ آتیٹی کمتی کن غیرفعال ادارہ غاتے چٹفنگ انگ ءِ و ڈاؤن سائزنگ نا پالیسی آ عمل کننگ انگ ءِ ، فیڈرل بورڈ آف ریونیو تون اوار زرگزران نا ڈیجیٹلائزیشن کننگک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او سے شنبے نادے آ برطانوی ایجوکیشنسٹ و برطانوی وزیراعظم نا ڈیلیوری یونٹ نا مسکوہی سروک سرمائیکل باربر نا کماشی ٹی ڈل اتون گپ وتران کرسا کرے ہراوزیراعظم تون داڑے اوڑدہی کرے۔ ڈل اٹی برطانوی فارن، ڈویلپمنٹ و کامن ویلتھ آفس نا ڈائریکٹر جوموئیر، و سینئر گورننس ایڈوائزرز نوید عزیز و میٹ کلینسی ئسک اوار ئسر۔ وزیراعظم پارے کہ پاکستان و برطانیہ نا تاریخی ہڑتوم آ کنڈآتا تعلقداری ءِ ہراکہ دہائی تیا تالان ءِ و وخت اتون پین سوگو مننگ ءِ، پاکستان برطانیہ تون تینا تعلقداری تے قدر انا نظر اٹ ہرک۔ اوپارے کہ برطانیہ پاکستان اٹی چندی بشخ آتیٹی کمکاری فراوان کننگ ءِ و پاکستان نا اہم شریدار ءِ، نن برطانوی حکومت نا منت وار اُن، ہڑتوم آ ملک آتا الس نا تین پہ تینی رابطہ غاتے پین سوگو کننگک۔ وزیراعظم پارے کہ حکومت پاکستان ملک انا زرگزرانی بحالی کن گچین گام گیج کننگ اٹی ءِ، سرکاری ملکیتی ادارہ غاتا نجکاری ءِ کننگ انگ ءِ ، فیڈرل بورڈ آف ریونیو تون اوار زرگزران ناڈیجیٹائزیشن کن گام گیج کننگ انگ ءِ، حکومتی خڑچ آتیٹی کمتی نا بابت غیر فعال ادارہ غاتے چٹفنگ انگ ءِ و ڈاؤن سائزنگ نا پالیسی آ عمل کننگ انگ ءِ۔ اوپارے کہ برآمدات و خراج بیس اٹی ودکی کن گام گیج کننگ انگ ءِ۔ پاکستان اٹی انفارمیشن ٹیکنالوجی وکشت وکشار تون تعلقدار برآمد آتا بابت بے پناہ کچ ارے۔ ڈل ءِ حوال اٹی پاننگاکہ بنجائی وزارت آتا کارکڑد ءِ ہُننگ نا بابت ٹاسک مینجمنٹ سسٹم اس جوڑ کننگانے۔ سرمائیکل باربر حکومت نا زرگزرانی بحالی نا پلان نا ستاءِ کرے و پارے کہ حکومت زرگزرانی اصلاحات نا بابت سہی سمت اٹ ہِننگ ءِ۔ اواومیت ظاہر کرے کہ وزیراعظم شہباز شریف نا گچین کماشی ٹی پاکستان زوت زرگزرانی مشکل آتا مون ءِ توننگ اٹ سرسہب مریک۔ ڈ ل انا باسک آک پاریر کہ برطانیہ پاکستان ءِ ہر بشخ اٹی پبی کمک و کمکاری فراوان کیک، پاکستان نا شونداری ننا شونداری ءِ، اوڑدہی ٹی بنجائی وزیر اقتصادی امور احد خان چیمہ ، بنجائی وزیر خزانہ و محصولات محمد اورنگزیب ، بنجائی وزیر صنعت و پیداوار رانا تنویر حسین ، وزیر مملکت انفارمیشن ٹیکنالوجی و ٹیلی کام شزہ فاطمہ ، وزیراعظم نا کوآرڈینیٹر رانا احسان افضل ، ڈپٹی چیئرمین پلاننگ کمیشن جہانزیب خان و تعلقدار بڑزکو سرکاری آفیسر آک ساڑی ئسر۔
