اسلام آباد۔ 09 جولائی (اے پی پی) اسپیکر قومی اسمبلی سردار ایاز صادق ملک و ملت کن گودی فاطمہ جناح نا خذمت آتیا خراج عقیدت پیش کرساپارینے کہ فاطمہ جناح قائد اعظم محمد علی جناح نا کماشی ٹی تحریک پاکستان اٹ اہم ءُ کڑد اس ادا کرے۔ او اسہ نڈر، بہادر، بااصول و سوگو ءُ اعصاب اسے نا مالک زالبول اس ئس۔ سے شنبے نادے آ گودی فاطمہ جناح نا 57 می کزیہ نا وخت آ تینا کلہو اٹی او پارے کہ مادر ملت نا کڑد زالبول آتیکن عزم و استقامت ، حوصلہ و راہشونی نا ذریعہ ءِ۔ او قائد اعظم محمد علی جناح نا راست دُو و جان نثار ایڑھ ئس۔ اوپارے کہ گودی فاطمہ جناح تحریک آزادی نا ہر ریسہ ٹی سیخاآنبار قائد اعظم تون اوار ئس۔ گودی فاطمہ جناح قائد اعظم محمد علی جناح آنبار باہمت، بااصول، خواری کش و ہرمشکل اٹی ثابت قدم سلوک آ زالبول ئس۔ گودی فاطمہ جناح زالبول آتا تحریک آزادی نا ہراول دستہ نا راہشون ئس۔ گوودی فاطمہ جناح پاکستان نا جوڑ مننگ آن پد عملی سیاست اٹ سرگرم عمل ئس۔ اسپیکر پارے کہ او الس خاص وڑاٹ زالبول آتا راجی آسودہی کن پبی کڑد ادا کرساکرے و پاکستان نا جوڑ مننگ آن پد پاکستان ویمن ایسوسی ایشن اس جوڑ کرے۔ اوناملک و قوم اکن پیش کروک آ خذمت آتے مدام روشنا لوز آتیٹی یات تخنگک۔
