اسلام آباد۔ 09 جولائی (اے پی پی) وزیراعظم محمد شہباز شریف پارینے کہ چیلنج آتیان پد ہم پاکستان اوغان باہوٹ آتا بھاز عزت و شرف اٹ مہمانداری ءِ کرینے، جہانی برادری اوغان باہوٹ آتا داخہ در کچ انا مہمانداری ءِ کننگ آن پاکستان آ تموک آ بھاریم ءِ کم کننگ و داویل انا دیرپا ایسری کن اجتماعی زمواری نا درشانی ءِ کے۔ داخیال آتا درشانی ءِ او سے شنبے نادے آ داڑے اقوام متحدہ نا ہائی کمشنر مہاجرین (یواین ایچ سی آر) فلیپو گرانڈی تون گپ وتران کرسا کرے ہرا وزیراعظم تون داڑے اوڑدہی کرے۔ اوڑدہی ٹی وزیراعظم یواین ایچ سی آر تون پاکستان نا متکن آ شریداری نا حوالہ ءِ ترسا چار دہائی تیان زیات وخت آن اوغان باہوٹ آتا مہمانداری ٹی اقوام متحدہ نا کنڈآن پاکستان نا مخ تفی نا ستاءِ کرے۔ وزیراعظم پارے کہ چندی چیلنج آتیان پد ہم پاکستان مدام اوغان باہوٹ آتا عزت و شرف اٹ مہمانداری ءِ کرینے۔ وزیراعظم داہیت آ زور شاغا کہ جہانی برادری اوغان باہوٹ آتا داخہ بھلا کچ انا مہمانداری ءِ کننگ آن پاکستان آ تموک آ بھاریم ءِ کم کننگ کن و داویل انا دیرپاایسری کن اجتماعی زمواری نا درشانی ءِ کے۔ وزیراعظم دا چرجوئی ٹی پاکستان نا کوشست آتے بھرمی کننگ کن یواین ایچ سی آر آ زور شاغا کہ او اوغان باہوٹ آتا حالیت آتون مون تننگ کن اسہ پائیدار ایسراسے مون آ دننگ اٹ تینا کڑدءِ اداکے۔ وزیراعظم پارے کہ اوغان باہوٹ آتا رکھ و باوقار وطن آ واپسی حکومت پاکستان نا اولیت آتیٹی اوار ءِ۔ وزیراعظم داہیت آ زور شاغا کہ اوغان باہوٹ آتا وطن آ واپسی ناویل اٹی جہانی برادری پاکستان ءِ مون تروک راجی و اقتصادی چیلنج و سلامتی نا خطرہ غاتے مون آتخے۔ اقوام متحدہ نا ہائی کمشنر تدوک آ کیہی دہائی آن لکھ آ اوغان باہوٹ آتا مہمانداری ءِ کننگ آ حکومت پاکستان ءِ بے مٹ مہمانداری کن خراج تحسین پیش کرے۔ اووزیراعظم ءِ باوری کرفے کہ یواین ایچ سی آر اوغان باہوٹ آتا بنداوی گرج آتے پورو کننگ کن پاکستان تون اواری اٹ کاریم کرسا کیک۔ یات سلے کہ اقوام متحدہ نا ہائی کمشنر 7 آن 9 جولائی 2024 اسکان پاکستان نا دورہ غاٹی ءِ۔
