کوئٹہ۔ 08 جولائی (اے پی پی) وزیراعظم محمد شہباز شریف پاکستان نا شونداری کن بلوچستان نا شونداری ءِ المی گوندسا پارینے کہ بلوچستان آن احساس محرومی ءِ مر کننگ و صوبہ نا شونداری ٹی تینا کڑد ءِ ادا کننگ ننا غٹ انا زمواری ءِ۔ دانش اسکول آتے بلوچستان اٹی ڈویژن نا کہول اسکان ودفنگ نا عزم ءِ، بلوچستان نا ورناک بڑزکو تعلیم یافتہ مریرہ تو او صوبہ و ملک انا شونداری ٹی تینا اہم کڑد ءِ ادا کیرہ۔ اوداخیال آتا درشانی ءِ دوشنبے نادے آ داڑے بلوچستان نا کابینہ نا دیوان آن تران کرسا کرے۔ داوخت آ گورنر بلوچستان شیخ جعفر خان مندوخیل ، وزیراعلیٰ میر سرفراز بگٹی ، بنجائی وزیر و صوبائی کابینہ نا باسک آک ساڑی ئسر۔ وزیراعظم شہباز شریف پارے کہ ای بلوچستان حکومت نا ٹہیفنگ آن پد اولیکو وار کوئٹہ غا بسونٹ ، گورنر ، وزیراعلیٰ بلوچستان و کابینہ تون اوار الس ءِ است انا حب اٹ مبارکبادی ایتیوہ کنے پورو یقین ءِ کہ وزیراعلیٰ بلوچستان نا کماشی ٹی صوبائی حکومت صوبہ نا الس نا خذمتءِ کیک و بلوچستان نا تہہ ٹی شونداری و شونہالی نا انقلاب بریک، گورنر بلوچستان گچین ءُ سیاست دان اسے اومیت ءِ کہ او آئینی زمواری تے جوانی اٹ سرایتک، اوپارے کہ بلوچستان اہم صوبہ اسے داڑے آباد بلوچ، پشتون، سیٹلرز آتون اوار مہرومریبت کروک آ زیبا غا مخلوق آک ءُ، دا صوبہ پاکستان نا زیبا علاقہ ءِ بدبختی اٹ شونداری نا دور اٹی دا پدی سلیس۔ اوپارے کہ خیبرپختونخوا، بلوچستان، سندھ و پنجاب نا الس تون اوار پاک فوج ، پولیس و ایلو ادارہ غاک بھلو قربانی تسنو۔ کشاری ٹیوب ویل آتا سولرآئزیشن نا بابت اوپارے کہ کنا قائد محمد نواز شریف نا کماشی ٹی مخلوط حکومت اسہ فیصلہ اس کرینے ہرانا مثبت نتیجہ دوئی مریک، بجلی نا سبسڈی والا بشخ چٹفسا 28 ہزار ٹیوب ویل آتا بجلی کنکشن آتے کشکسا سولر آ گدریفنگک۔ اگہ ٹیوب ویل آک سولر آ چلینگرہ تو اڑزآن بجلی زمیندار آتے میسر مریک۔ وزیراعلیٰ بلوچستان قول کرینے کہ 28 ہزار ٹیوب ویل آتے 3 تُو اٹی شمسی توانائی آ گدریفنگک ہرا اسہ بھلو چیلنج اسے کنا مخلصانہ سلاہ ءِ کہ 28 ہزار ٹیوب ویل آتے شمسی توانائی آ گدریفنگ کن اخہ در زیات کمپنی مریک ہموخس ہی اونا نہاد کم مریک ہراڑآن زمیندار آتے آسانی مریک۔ وزیراعلیٰ تینٹ جوان ءُ ایڈمنسٹریٹر اسے۔ دا ڈٹ آن بجلی نا دُزی نا خاتمہ مریک، ڈٹ اکن بنجائی وزیر توانائی سردا ر اویس احمدلغاری، بنجائی وزیر خزانہ اورنگزیب، وزیر کانود اعظم نذیر تارڑ، بنجائی وزیر صنعت جام کمال، بنجائی وزیر حوالکاری عطاء تارڑ ، سیکرٹری توانائی، سیکرٹری خزانہ و خاص وڑاٹ وزیراعلیٰ بلوچستان میر سرفراز بگٹی و ایلوفتا کوشست آک ستاکڑزرہ۔ اوپارے کہ است اٹ بھاز خوشی مس کہ وزیراعلیٰ بلوچستان ڈٹ انا فالواپ کرے۔ اوپارے کہ مچ آپاکستان اٹی تیل آ چلینگوک آ 10 لکھ ٹیوب ویلز ءُ ہرافتیا سالانہ 3.5 ارب ڈالر خڑچ بننگ ءِ ننے اواری اٹ اسہ بزنس ماڈل اسے نا رداٹ صوبہ غاتون اواری اٹ کاریم کروئی مریک و داخہ بھلا خڑچ آن تینے چٹفوئی مریک۔ صوبہ غاتون زوت اسہ ماڈل اس جوڑ کننگک وزیراعظم پارے کہ نن وام تیٹی تموک اُن، بنجاو صوبہ غاک اواری اٹ الس نا گچینی کن کاریم کیرہ تو ننا بروک آ چینک ننے یات تخرہ و اگہ دا موقع ءِ زیان کرین تو ننا بروک آچینل ننے اسُل معاف کپسہ، آخبت تیل آ چلینگوک آ ٹیوب ویل آتیکن زوت اسہ ماڈل اس اتسا قومی مفاد اٹی اسہ بھاز بھلو فیصلہ اس کننگ اُن وزیراعظم پارے کہ بنجادا سال بلوچستان اٹی دانش اسکول آتیکن بجٹ جتا کرینے ایلو صوبہ غاتون زییات وسیلہ ارے وخت اس کہ بلوچستان نا جغرافیائی بابت رقبہ بھاز بھلن ءِ دافاصلہ غاتیکن وسیلہ غاتا گرج ءِ و بنجاغان دانش اسکول آتا ڈٹ بلوچستان کن تخانن، وزیراعظم بلوچستان حکومت ءِ صوبہ نا غٹ ویل آتے ایسر کننگ نا باوری کرفسا پارے کہ صوبہ نا غٹ ویل آتا ایسری اس اواری اٹ کشنہ۔ بلوچستان آن محرومی نا احساس ءِ مر کننگ و صوبہ نا شونداری ٹی تینا کڑد ءِ ادا کننگ ننا غٹ انا زمواری ءِ۔ دانش اسکول آتے بلوچستان اٹی ڈویژن نا کہول اسکان ودفنگ نا عزم ءِ۔ اوپارے کہ بنجا بلوچستان نا شونداری و شونہالی کن صوبائی حکومت تون اواری اٹ کاریم کیک چین اٹی سرکاری وظیفہ غاتیا کشاری بشخ انا کسبی تربیت کن گدریفوک آ طالب علم آتیٹی بلوچستان نا 10 درسد زیات طالب علم آتا کوٹہ تخانے چین اٹی ہواوے نا رداٹ مسہ لکھ پاکستانی ورناتا انفارمیشن ٹیکنالوجی بشخ اٹی تربیت اٹی ہم بلوچستان نا طالب علم آتیکن 10 درسد ودکی کوٹہ مقرر کننگانے بلوچستان نا ورناک بڑزکو تعلیم یافتہ مریرہ تو او صوبہ و ملک انا شونداری ٹی تینا اہم کڑد ءِ ادا کیرہ، اوپارے کہ آئی ایم ایف آ ہِننگ ننا بیوسی ءِ ننا قابل وزیرخزانہ نا سلاہ ءِ کہ اگہ نن اصلاحات کتون تو ننے پین ہم آئی ایم ایف آ ہنوئی تمنگ کیک ہرا سہی مفک۔ اوپارے کہ اگہ نن تینا وسیلہ غاتے کاریم اٹ اتینہ تو داویل آتیان پیش تمنگ کینہ ہندا تُو آئی ایم ایف نا پروگرام کن اپروچ کروئی ءِ آئی ایم ایف نا پروگرام ءِ چٹفنگ مشکل ضرور ارے ولے ناممکن اف۔ مشکل آن گدرینگسا ہی بھلا بھلا قومک جوڑ مسنو جاپان، چین و ایلو فتا درورآک ننا مون آٹی ءُ ، اوپارے کہ ہمودور بریک ہراتم نن شونداری نا کنڈآ کانہ، اسلام آباد اٹی الس کن ہم اسہ ڈٹ اس تیار کرینے ہراٹی الس ءِ ریلیف ایتنہ۔ بنجابلوچستان نا شونداری و شونہالی کن صوبائی حکومت تون تفوک اُن صوبہ غاتیٹی زرکاری کن امن و ایمنی اولیکو شڑط ءِ صوبائی کابینہ ٹی اوار وزیرآتے تینا علاقہ غاتیٹی امن و ایمنی نا حالیت آتا علم ارے۔ اوپارے کہ ہراتم ای تدوک آ دور اٹی وزیراعظم ئسٹ تو گوادرنا 2022-23اٹی ہفت آن ہشت دورہ کرینٹ داسہ ننا حکومت بس تو سماتما کہ او سیف سٹی والا ڈٹ بند کننگا۔ گوادر اسہ بھلو گچین کمرشل بندرگاہ اس جوڑ مریک چین گوادر اٹی ایئرپورٹ ، ہسپتال نا ڈٹ تس۔ دہشت گردی نا واقعہ غاتا بابت اوپارےکہ ہرادشمن چین نا برخلاف کاریم کننگ ءِ او بلوچستان، پاکستان و ننا غٹ انا دشمن ءِ او واکدار تے نن غٹ چانہ اللہ تعالیٰ ننے وسیلہ تسنے، اسہ گچین فوج اس ننتون ارے نن اواری اٹ داناسور ءِ چٹفنگ کینہ ارب آ ڈالر نا زرکاری بریک تو اونا فائدہ غٹ آن مست بلوچستان ءِ ملک، وزیراعلیٰ بلوچستان و ایلو ادارہ غاتون گپ وتران مرسا کیک ہر اویل آک ءُ اواری اٹ اوفتے ایسر کینہ، ہرا پاکستان نا خیرءِ خوارہ اوفتے خمب اٹ خلینہ بلوچ و پشتون تینا وطن تون مخلص ءُ۔
