کوئٹہ۔ 08 جولائی (اے پی پی) بلوچستان کابینہ صوبہ نا جامعہ غاتیٹی پوسکن آبھرتی تیا پابندی عائد کرسا پبلک سیکٹر یونیورسٹیز ایکٹ انا جاچ ءِ ہلنگ و ایلوصوبہ غاتون موازنہ ءِ کننگ کن خصوصی کمیٹی اس جوڑ کرینے۔ صوبائی کابینہ نا چارمیکو دیوان وزیراعلیٰ بلوچستان میر سرفراز بگٹی نا کماشی ٹی دوشنبے نادے آ داڑے چیف منسٹر سیکرٹریٹ اٹی اڈ ہلک۔ دیوان اٹی صوبائی کابینہ بلوچستان اٹی سرکاری ملکیت ڈغار ءِ گرین کارپوریٹ شریداری ڈٹ انا رداٹ آباد کننگ نا منظوری ءِ تس، چندی محکمہ غاتا ایجنڈا پوائنٹ آتیا اہم فیصلہ کننگا و لازممی ڈیپارٹمنٹل امور ءِ پک کننگا کابینہ بلوچستان یونیورسٹیز ایکٹ انا جاچ ءِ ہلنگ کن خصوصی کمیٹی اس جوڑ کننگ آ امنا کننگا۔ کمیٹی ٹی صوبائی وزیر میر ظہور بلیدی، میر شعیب نوشیروانی، بخت خان کاکڑ، سیکرٹری ہائیرایجوکیشن اوار مریرہ، دا کمیٹی 7 دے اٹی سلاہ و سوج پیش کیک ہرافتے مون آ تخسا مستی گام گیج کننگک۔ وزیراعلیٰ بلوچستان میر سرفراز بگٹی کابینہ دیوان آن تران کرسا پارے کہ بلوچستان اٹی گڈ گورننس نا قیام و سروس ڈلیوری نا نظام ءِ گچین کننگ کن صوبائی حکومت پورو تندہی اٹ کاریم کننگ اٹی ءِ و چندی محکمہ غاتا گچینی کن اصلاحات اتنگ انگ ءِ۔ اوپارے کہ وخت آن زیات سہی سمت انا تعین اہمیت تخک، نن سہی کسر نا گچین کاری ءِ کرسا عمل کروئی ءِ و ہندن ءُ پائیدار حکمت عملی اس جوڑ کروئی ءِ ہرانا بھرمک بروک آ چین اسکان سرمریرہ۔ اوداہیت آ تاسف نادرشانی ءِ کرے کہ جامعہ غاتون تنخواہ تا پیسہ اف ولے دھڑادھڑ بھرتی کننگ انگ ءِ و پوسکن ءُ بلڈنگ جوڑ کننگ انگ ءِ، تروک آ وسیلہ غاتا نسبت کوالٹی نا جاچ ءِ ہلین تو باندات آک مایوسی ناحداسکان خراب ءُ، ننے مصلحت و ذاتی فائدہ غاتیان ایڑتر فیصلہ کروئی مریک۔ وزیراعلیٰ پارے کہ جامعہ غاتے وسیلہ غاتا فراوانی آن وخت اس ہم انکار کتنے ولے چیک اینڈ بلینس نا گچین نظام اس جوڑ کننگ المی ءِ۔
