اسلام آباد۔ 08 جولائی (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد بھرتھ پارینے کہ پاکستان دنیا نا غٹ آن زیات آبادی والا ملک آتیان پنچ میکو نمبرآٹی ءِ، 2023 نا مردم شماری نا رداٹ پاکستان نا آبادی 241 ملین ءِ، ساڑی آبادی 2.55 درسد نا بڑزکو کچ آن ودنگ ءِ۔ دوشنبے نادے آ وزارت جان جوڑی آن جاری بیان نا رداٹ ورلڈ پاپولیشن ڈے انا بابت تینا بیان اٹی ڈاکٹر مختاراحمد بھرتھ پارے کہ دادے انا مسخت الس اٹ شعور ودی کرسا پائیدار آخبت نا کنڈآ راہشونی کروک ایسر اس کشوئی ءِ۔ داسال آبادی نا جہانی دے انا مرکزی خیال ’’غٹ اکن سنبرینگوک و بریبرآخبت نا کنڈآ جوان حساب وکتاب نا قوت ءِ تینا کننگ‘‘ ءِ۔ پاکستان دنیا نا غٹ آن زیات آبادی والا ملک آتیان پنچ میکو نمبرآٹی ءِ۔ 2023 نا مردم شماری نا رداٹ پاکستان نا آبادی 241ملین ءِ۔ اوپارے کہ ساڑی آبادی 2.55 درسد نا بڑزو کچ آن ودنگ ءِ۔ پاکستان نا آبادی 2030اسکان 263ملین و 2050 اسکان 383 ملین اسکان سرمننگ نا گمان ءِ۔ آبادی ٹی ودکی نا دا بڑزکو کچ ننا قومی شونداری کن چیلنج و ننا وسیلہ غاتیا زور انا سوب ءِ۔ ڈاکٹر مختار احمد بھرتھ پارے کہ قومی لائحہ عمل آ گچین عملدرآمد ملک اٹی آبادی نا سوگوی ءِ پک کننگ نا کنڈآ اسہ اہم ءُ گا م اسے۔ بنجائی و صوبائی ٹاسک فورس آتا قیام آبادی نا مون ءِ توننگ کن بڑزکو کہول انا حکومتی عزم انا عکاسی ءِ کیک۔ ڈاکٹر مختار احمد بھرتھ پارے کہ سیمیناراٹی بنجائی و صوبائی وزیر ، غٹ اسٹیک ہولڈر و میڈیا نا نمائندہ غاک ہم بشخ ہلیرہ۔
