اسلام آباد ۔ 07 جولائی (اے پی پی) صدر مملکت آصف علی زرداری پاکستانی قوم و امت مسلمہ ءِ پوسکن آ اسلامی سال 1446ھ نا بناء آ مبارکبادی ترسا دعاکرینے کہ دا ہجری سال ننکن امن، شونہالی و سوگوی نا سوب جوڑمرے۔ شنبے نادے آ ایوان صدر نا میڈیاونگ آن جاری کروک بیان نا رداٹ پوسکن آ اسلامی سال 1446ھ نا بِناء آ صدر مملکت آصف علی زرداری تینا کلہو اٹی پارے کہ ای پاکستانی قوم و امتِ مسلمہ ءِ پوسکن آ اسلامی سال 1446ھ نا بناآ مبارکبادی پیش کیوہ، ای اللہ تعالیٰ نا حضور دعاکیوہ کہ دا ہجری سال ننا ملک اکن امن، شونہالی و سوگوی نا سوب مرے۔ اوپارے کہ محرم الحرام اسلامی تاریخ اٹ خاص اہمیت و فضیلت تخک، روچہ مبارک نا تُو آن پد محرم الحرام اٹی عبادت آتے خاص فضیلت دوئی ءِ، داتُو اٹی اللہ تعالیٰ ہروڑنا قتل آتیان منع فرمائفسا بندگی نا کاریم تیٹی مشغول مننگ نا تلقین فرمائفینے۔ پوسکن آ اسلامی سال انا بناننے گناہ تیان بچنگ، اتباعِ الٰہی کننگ و دینِ اسلام نا رغاموک آتیا سجفنگ نا یات دہانی کرفک۔ اوپارے کہ دا تُو دین نا سرفرازی نا خاطر حضرت امام حسین رضی اللہ تعالیٰ عنہ و اونا وفا شعار سنگت آتا بے مٹ قربانی نا ہم یات ءِ تازہ کیک و ننے داہیت انا سبخ ایتک کہ دین نا سربلندی نا خاطر جہد ہی اصل مسخت حیات ءِ۔ حضرت امام حسین رضی اللہ تعالیٰ عنہ و اونا سنگت آک بے سروسامانی نا عالم اٹ ظلم و طاغوتی واکدار آتا مقابلہ ءِ کرسا تینا جون تے ندر کریر۔ او و اونا سنگت آک ظلم و استبداد نا برخلاف جہد اٹی قربانی و استقامت نا استعارہ نا وڑاٹ امرمسر۔ دا تُو ءِ مکرم ننے اطاعت الٰہی، ظلم انا برخلاف سلنگ و حق انا سرسہبی نا خاطر بھلن آن بھلا مصیبت آن پدہم ثابت گام سلنگ نا ہم درس ایتک۔ صدر مملکت پارے کہ پوسکن آ اسلامی سال ننے تینا زند و طرزعمل آ سجفنگ و اوفتے اسلامی رغاموک آتا رداٹ شاغنگ نا ہم موقع فراوان کیک، ننے تینا تہہ ٹی حق و باطل اٹ پرخ و دین نا سہی رغاموک آتا بابت فہم و شعور ودی کروئی مریک، ننے غٹ ءِ مرے کہ نن تینا تہہ ٹی اخوت، صبر و سگ انا خصوصیت آتے ودی کین و تین پہ تینی اختلاف آتے اسہ پلو تخسا قومی یکجہتی و بین المسالک ہم گرنچی نا مون آ دننگ کن کڑد ادا کین۔ ای اللہ تعالیٰ نا حضور دعاکیوہ کہ او ملکِ پاکستان ءِ ہروڑنا آفت و مصیبت آتیان رکھے و ننے غٹ ءِ تینا زند ءِ اسلامی اصول آتا رداٹ تیر کننگ نا توفیق عطاکے۔ اللہ تعالیٰ ننا حامی و ناصرمرے۔ آمین!
