کراچی۔ 07 جولائی (اے پی پی) وزیراعظم محمد شہباز شریف چیئرمین ایف بی آر ءِ پاکستانی بندرگاہ تیا اولیتی بنداوتیا پوسکن ءُ اسکینرز خلنگ نا پارت کرساپارینے کہ کسٹمز کمامدارآک پورٹ کمامدارآتون اواری اٹ بندرگاہ تا کچ آن پورو فائدہ دوئی کننگ کن زوت گام گیج آتے پک کیر، شنبے نادے آ وزیراعظم آفس نا میڈیا ونگ آن جاری کروک بیان نا رداٹ وزیراعظم محمد شہبا ز شریف ہیچھیسن پورٹ، ساؤتھ ایشین پاکستان ٹرمینل نا دورہ ءِ کرے۔ داوخت آ وزیراعظم محمد شہباز شریف ءِ ٹرمینل نا آپریشن تا بابت حوال تننگا، حال اٹی پاننگاکہ کراچی ٹی ہیچھیسن پورٹ، ساؤتھ ایشین پاکستان ٹرمینل دنیا نا منہ کڑمب دیر آ ساڑی ٹرمینل آتیان اسٹ ءُ، پورٹ ٹرمینل ءِ پوسکن آ وڑاٹ چلیفنگ انگ ءِ ہراٹی زیات تر آپریشن خودکار ءُ، پورٹ ٹرمینل آ پوسکن ٹیکنالوجی و اسکینرخلنگانے۔ وزیراعظم ءِ پورٹ ٹرمینل نا کچ انا بابت معلومدار کرسا پاننگاکہ پورٹ 35 لکھ کنٹینر سالانہ ات و در نا لائخی تخک۔ ایف بی آر نا کنڈآن بندرگاہ تیا پوسکن آتا خلنگ نا عمل گڈیکو ریسہ غاتیٹی ءِ ہراٹی پوسکن آ ازباب و مصنوعی ذہانت نا کمک اٹ کنٹینرآتا کم وخت اٹی اسکیننگ کننگ مریک۔ وزیراعظم محمد شہباز شریف پارے کہ پورٹ ٹرمینل نا آپریشن جہانی آب انا رداٹ ءِ، وزیراعظم ہیچھیسن پورٹ، ساؤتھ ایشین ٹرمینل نا پوسکن آ آپریشن آتا ستاءِکرے۔ اوچیئرمین ایف بی آر ءِ پاکستانی بندرگاہ تیا اولیتی بنداو تیا پوسکن اسکینرخلنگ نا پارت کرے، وزیراعظم پارے کہ کسٹمز کمامدارآک پورٹ کمامدارآتون اواری اٹ بندرگاہ تا کچ آن پورو فائدہ دوئی کننگ کن زوت گام گیج آتے پک کیر، اوپارے کہ پاکستان نا برآمدی صنعت نا شونداری کن بندرگاہ تا شونداری بھاز اہم ءِ، ملکی برآمد آتا ودکی کن حکومت اولیتی بنداوتیا گام گیج کننگ اٹی ءِ، حکومت ڈیہہ انا ایلو ملک خاص کر نیامی ایشیائی ریاست آتیکن گونڈو جوان انگا سمندری راہداری فراوان کننگ نا بابت پاکستانی بندرگاہ تا شونداری کن گام گیج کننگ ءِ ، نیامی ایشیائی ریاست، چین و ایلو ملک آتا پاکستانی بندرگاہ تا کمک اٹ واپار آن پاکستان ہرسال ارب آ ڈالر نا زرمبادلہ کٹیا کننگ کیک۔ بنجائی وزیر محمد اورنگزیب، عطاء تارڑ، جام کمال خان، قیصر احمد شیخ، احد خان چیمہ گورنر سندھ کامران خان ٹیسوری، وزیراعلی سندھ سید مراد علی شاہ، چیئرمین ایف بی آر و تعلقدار بڑزکو کمامدارآک ہم دورہ ٹی وزیراعظم تون اوار ئسر۔
