کراچی۔ 07 جولائی (اے پی پی) وزیراعظم محمد شہباز شریف شپنگ لائیز نا ریگولیشن کن جوان ءُ لائحہ عمل و بندرگاہ تیا اسکیننگ نا پوسکن ءُ مشینری اس زوت خلنگ نا پارت کرسا پارینے کہ کراچی پورٹ ٹرسٹ اسکان و اوڑآن گڑاتا بے سلنگ آن فراوانی ءِ پک کننگ کن لیاری ایکسپریس وے ءِ کارگوٹریفک کن 24 گھنٹہ یلہ تخنگے، کراچی ٹی ساڑی بندرگاہ تا شونداری آن ویلیو ایڈیشن نا صنعت آن برآمد آتیٹی ودکی کینہ۔ یک شنبے نادے آ وزیراعظم آفس نا میڈیا ونگ آن جاری کروک بیان نا رداٹ وزیراعظم محمد شہباز شریف ءِ کراچی پورٹ ٹرسٹ آ بننگ آ بندرگاہ و نیشنل فلیگ کیریئر پاکستان نیشنل شپنگ کارپوریشن آ سرجمی اٹ حوال تننگا۔ وزیراعظم محمد شہباز شریف پارے کہ پاکستان جغرافیائی اعتبارا ٹ ڈیہہ ٹی بھاز اہمیت تخک،زوت آتے اٹ تینا دورہ ءِ قزاخستان اٹی روسی صدر ولادیمیر پیوٹن و نیامی ایشیائی ملک آتا راہشون آتون اوڑدہی مس، پاکستان نیامی ایشیائی ریاست آتیکن سمندری واپار نا غٹ آن جوان ءُ کسر اس فراوان کیک، نیامی ایشیائی ریاست آک واپار کن پاکستان نا بندرگاہ تا کاریم اٹ اتنگ اٹ بھاز است خواہی نا درشانی ءِ کرینو، اوپارے کہ بندرگاہ تیٹی پوسکن آ نظام و اوفتسکان رسینگ اٹ پین گچینی کراس پاکستان ارب آ ڈالر نا زرمبادلہ دوئی کننگ کیک، کراچی ٹی ساڑی بندرگاہ تا شونداری آن ویلیو ایڈیشن نا صنعت آن برآمدآتیٹی ودکی کینہ۔ وزیراعظم پارے کہ پورٹ قاسم و کراچی پورٹ ٹرسٹ آ پوسکن آ ازباب و مشینری نا خلنگ آن کسٹمز کلیئرینس نا وخت ءِ کم کننگ کن گام گیج کننگے، بندرگاہ تیا اسکیننگ نا پوسکن آ مشینری نا زوت خلنگ ءِ پک کننگے، بندرگاہ تا کچ آن پورو فائدہ ہرفنگ کن اولیتی بنداوتیا گام گیج کننگے۔ وزیراعظم پارت کرے کہ کراچی پورٹ ٹرسٹ اسکان و اوڑآن گڑاتا بے سلنگ آن فراوانی ءِ پک کننگ کن لیاری ایکسپریس وے ءِ کارگو ٹریفک کن 24 گھنٹہ یلہ تخنگے۔ وزیراعظم پارے کہ گڑاتا فراوانی ءِ پین گچین کننگ کن ملیر ایکسپریس وے ءِ بندرگاہ تون گنڈنگے، اوپارت کرے کہ کراچی پورٹ اسکان و اوڑآن ریل انا کمک اٹ گڑاتا فراوانی نا کچ ءِ ودفنگے، پورٹ قاسم آ ایل این جی جہاز آتا فیس ءِ کم کرسا اوفتے جہانی کہول آ رائج ریٹ آتا رداٹ مقرر کننگے، اوپارے کہ شپنگ لائیز نا ریگولیشن کن اسہ جوا ن ءُ لائحہ عمل اس جوڑ کرسا زوت پیش کننگے۔ وزیراعظم پارت کرے کہ پاکستان نیشنل شپنگ کارپوریشن تینا خڑچ ءِ کم کننگ و تینا آپریشن تے گچین کننگ کن اسہ جوان ءُ لائحہ عمل اس جوڑ کرسا پیش کے۔ اوپارے کہ ملک اٹی نجی بشخ انا شونداری، کاروبار اٹی آسانی و زرکارآتے آسراتی حکومت نا اولیت آک ءُ، اللہ نا فضل وکرم اٹ پاکستان نا زرگزران سوگو ءِ و شونداری نا کنڈآ ہِننگ ءِ، پاکستان نا برآمدی صنعت نا شونداری کن برآمد کنندگان تے ہروڑنا آسراتی تننگ اُن۔ وزیراعظم شہباز شریف کراچی ٹی کراچی پورٹ ٹرسٹ، پورٹ قاسم اتھارٹی و نیشنل شپنگ کارپوریشن نا بابت دیوان نا کماشی ءِ کرے۔ دیوان اٹی بنجائی وزیر محمد اورنگزیب، جام کمال خان، احد خان چیمہ، عطاء اللہ تارڑ، قیصر احمد شیخ، گورنر سندھ کامران جان ٹیسوری، وزیرِ اعلی سندھ سید مراد علی شاہ، چیئر مین ایف بی آر، چیئرمین پی این ایس سی،پی کیو اے،کے پی ٹی و تعلقدار بڑزکو کمامدارآک ساڑی ئسر۔ دیوان ءِ کراچی پورٹ ٹرسٹ، پورٹ قاسم و پاکستان نیشنل شپنگ کارپوریشن نا آپریشن نا بابت حوال تننگا۔ وزیرِ اعظم کراچی پورٹ ٹرسٹ ءِ بندرگاہ نا کارکڑد نا ڈیہہ انا ایلو بندرگاہ تتون موازنہ غا تالان اسہ رپورٹ اس پیش کننگ ناپارت کرے۔
