اسلام آباد۔ 07 جولائی (اے پی پی) بنجائی وزیر داخلہ و انسداد منشیات محسن نقوی پارینے کہ منشیات نا ودوک آ کچ انا مون ءِ توننگ کن دمدستی وڑاٹ کثیر الجہتی گام گیج کروئی مریک۔ تینا چناتیکن غٹ پورو واک و پکاعزم اٹ دالعنت نا برخلاف جہادکروئی مریک۔ یک شنبے نادے آ وزارت داخلہ غان جاری کروک بیان نا رداٹ بنجائی وزیر داخلہ و انسداد منشیات محسن نقوی اے این ایف ہیڈکوارٹر نا دورہ ءِ کرے۔ اونا ڈی جی اے این ایف میجر جنرل عبدالمعید اودے بخیرکرے۔ بنجائی وزیر داخلہ و انسداد منشیات محسن نقوی نا کماشی ٹی اے این ایف ہیڈکوارٹراٹی اہم ءُ دیوان اس مس۔ بنجائی وزیر داخلہ و انسداد منشیات محسن نقوی ءِ اے این ایف نا کارکڑد۔ افعال کار و آپریشن تا بارواٹی حوال تننگا، وزیرداخلہ وانسداد منشیات محسن نقوی کم وسیلہ و افرادی قوت آن پد ہم مچ آ پاکستان اٹ ڈرگ مافیا نا برخلاف گچین کاررروائی تیا اے این ایف ناکارکڑد انا ستاءِ کرے، دیوان اٹی پوسکن آ چین ءِ منشیات نا لعنت آن بچفنگ کن ڈرگ مافیانا برخلاف گچین کریک ڈاؤن نا فیصلہ ءِ کرسا دابابت جوان ءُ پلان اس بٹنگ انگا۔ سرکاری و نجی یونیورسٹی، کالج و ہاسٹل آتیٹی منشیات خاص کر آئس نا ہل و بہاءِ توننگ کن پبی کارروائی کننگک، دارداٹ صوبہ غاتون سلابت کننگک و پت اٹ ہلنگک، بنجائی و صوبائی محکمہ غاتا اسیجائی دیوان برجاتُو انا ایسر اٹ اڈ ہلیک، صوبہ غاتا وزیر ایکسائز و آئی جی پولیس دیوان اٹی بشخ ہلنگ نا سلہ خلنگک۔ دیوان اٹی منشیات نا آن لائن ہل و بہاءِ توننگ کن ہم پلان اس طلب کننگا۔ وزیرداخلہ و انسداد منشیات محسن نقوی اے این ایف ءِ سائبر ڈرگ کنٹرول میکنزم اس تیار کننگ نا پارت کرے۔ وزیرداخلہ پارے کہ منشیات خاص کر آئس نا لعنت کیہی خاہوت آتے بھس کرینے۔ منشیات نا ودوک آ کچ انا مون ءِ توننگ کن دمدستی وڑاٹ کثیر الجہتی گام گیج کروئی مریک۔ محسن نقوی پارے کہ تینا چناتیکن غٹ پورو واک و پکا عزم اٹ دالعنت نا برخلاف جہاد کروئی ءِ۔ اینو نن دا لعنت نا چٹفنگ اٹ تینا بشخ ءِ شاغان تو دا بھاز بھلو خیرانا کاریم اس مریک، وزیرداخلہ و انسداد منشیات محسن نقوی اے این ایف ہیڈکوارٹراٹی یات گارشہداء آ حاضری تس۔ محسن نقوی شہید آتا یات گار آ پھل تخا۔ دعاپاتیا کرے و شہید آتا عظیم قربانی تے خراج عقیدت پیش کرے۔ بنجائی وزیر داخلہ و انسداد منشیات محسن نقوی لان اٹی نیال اس خلک، بنجائی سیکرٹری داخلہ خرم آغا و اے این ایف نا بڑزکو کمامدارآک ہم داوخت آ ساڑی ئسر۔
