اسلام آباد۔ 07جولائی (اے پی پی) بنجائی وزیر داخلہ محسن نقوی پروٹیکٹیڈ صارف آتے اووربلنگ نا ودوک آ غاوتا سخت نوٹس ءِ ہلسا پروٹیکٹڈ صارف آتے اووربلنگ کروک آ آفیسر و عملہ نا برخلاف کانودی کارروائی نا پرمان کرینے۔ وزارت داخلہ نا کنڈآن جاری اعلامیہ نا رداٹ وزیرداخلہ دابابت بنجائی جاست و پاستی ادارہ (ایف آئی اے) نا غٹ ڈائریکٹر آتے پرمان جاری کرینے۔ بنجائی وزیر داخلہ پارے کہ 200 یونٹ کاریم اٹ اتوک آ صارف آتون مروک آ ناانصافی نا ازالہ ءِ کننگے، پروٹیکٹڈ صارف آتے رزاک اٹ نان پروٹیکٹڈ کیٹگری ٹی اوار کننگ مجرمانہ ءُ کاریم اسے۔ ہرانا اسُل موکل تننگ مفک۔ اوپارے کہ ایف آئی اے غٹ حالیت آتا جاچ ءِ ہلے و راستکی تے مون آتخسا بے پرخ زموارآتا برخلاف ایکشن ہلے۔ محسن نقوی مستی پارے کہ پروٹیکٹڈ صارف آتے نان پروٹیکٹیڈ صارف آتا لڑاٹی اوار کننگ ءِ ہچ ءُ حالیت اسے ٹی منپنہ، اووربلنگ آن پروٹیکٹڈ کیٹیگری بدل مننگ آں صارف آتیا کروڑ آ روپئی نا ودکی بھاریم تمانے۔ بنجائی وزیر داخلہ پارے کہ پروٹیکٹڈ صارف آک مہالوآن مشکل آتا گواچی ءُ، اووربلنگ آن اوفتا مشکل آک پین ودانو، پروٹیکٹڈ صارف آتا کنڈآن اووربلنگ نا غاوتاازالہ ءِ کننگے۔ بنجائی وزیر پارت کرے کہ پروٹیکٹڈ صارف آتون مروک آ ناانصافی نا ازالہ ءِ کننگے۔
