اسلام آباد۔ 07 جولائی (اے پی پی) اسپیکر قومی اسمبلی سردار ایاز صادق و ڈپٹی اسپیکر سید غلام مصطفیٰ شاہ محرم الحرام نا بِنانا وخت آ اُمت مسلمہ ءِ مون تروک ویل آتون مون تننگ کن غٹ اختلاف آتے است آن درسا اسہ ایلو ٹی سیوت و ایلمی ءِ مون آ دننگ نا گرج آ زور شاغانو۔ اوفک پاریر کہ تینا صف آتیٹی سیوت جوڑ کرسا ہی نن اُمت مسلمہ ءِ تنکی تیان کشنگ کینہ۔ اوفک پاریر کہ ننے اسلامی پوسکن آسال انا وخت آ پاکستان ءِ پوسکن آ عزم و ولولہ اٹ مون آدننگ و اسلامی روایت آتیا گچین وڑاٹ عمل کرسا اسلام ناحقی کلہو ءِ تالان کروئی مریک۔ اوفک مستی پاریر کہ داپوسکن آ سال انا وخت آ مچ ا مسلم دنیا ءِ فلسطین اٹی اسرائیلی ظلم انا توننگ کن تینا کڑد ءِ ادا کننگ نا قول کروئی مریک۔ قومی اسمبلی سیکرٹریٹ ڈائریکٹریٹ جنرل آف میڈیا نا کنڈآن یک شنبے آ جاری اعلامیہ نا رداٹ داخیال آتا درشانی ءِ اوفک پوسکن آ اسلامی سال انا اولیکو تُو محرم الحرام 1446ہجری نا بنانا وخت آ تینا جتا جتا کلہو آتیٹی کریر۔ اسپیکر پارے کہ دامقدس آ تُو ننے کربلا نا شہید و خلیفہ ثانی حضرت عمر فاروق رضی اللہ عنہ نا عظیم شہادت آتا یات ترفک۔ اوپارے کہ خلیفہ ثانی حضرت عمر فاروق رضی اللہ عنہ تینا فہم و فراست نا کمک اٹ دین اسلام ءِ عروج اسکان سرکرے۔ اوپارے کہ حضرت عمر فاروق رضی اللہ عنہ تینا دور ءِ حکومت اٹ کانود نا حکمرانی نا ہمو بڑزکو درور اس قائم کرے ہرادے اینو غیرمسلم آک ہم منرہ۔ اسپیکر پارے کہ کربلانا شہید آک حق و سچ اکن ہرا عظیم قربانی تے تسر اوفتا پیروی ءِ کرسا نن دنیا ٹی امن قائم کننگ کینہ۔ اومستی پارے کہ کربلانا شہید آتا قربانی آن ننے ایثار و صبر و استقامت نا درس دوئی مریک۔ اسپیکر پارے کہ اسلام امن، مہرومریبت و سگ انا مذہب ءِ و فرقہ واریت انتہاپسندی و تعصب نا نفی ءِ کیک۔ اوعالم دین و مذہبی اسکالر آتے چندی فرقہ غاتا مسلمان تا نیام اٹ ہم گرنچی ودی کننگ کن تینا کڑدءِ ادا کننگ و اسلام نا حقی کلہو ءِ تالان کننگ کن پارے۔ اسپیکر ملک آن دہشت گردی نا چٹفنگ و فرقہ پرستی نا مقابلہ ءِ کننگ کن تین پہ تینی اختلاف آتے گیرام کرسا اسہ جوان ءُ حکمت عملی اس جوڑ کننگ آ زور شاغا۔ اوپارے کہ فلسطین آ برجا اسرائیلی ظلم انا توننگ کن غٹ مسلم ملک آتے یکجا مرسا کاریم کروئی مریک۔ اوپارے کہ تدوک آ کیہی تُو آن اسرائیل کودک فلسطینی تیا ظلم و بربریت نا بربریت کننگ ءِ ہرانا سوب آن ہزار آ بے گناہ، کودک چنا، زالبول و بزرگ شاری تینا جون تے ندر کرینو و ہزار آ بے اُرامسنو حتیٰ کہ ظالم اسرائیلی فوج ہسپتال آتسکان تینا ظلم و بربریت نا شست کرسا دنیا ٹی ظلم و بربریت نا پوسکن آ داستان اس نوشتہ کرینے۔ اسرائیل فلسطین اٹ انسانی حق انا سنگین خلاف ورزی تا مرتکب خننگانے۔ فلسطین اٹ برجاانسانی حق انا سنگین خلاف ورزی تیا اقوام عالم نا چُپی سمجھ آن پیشن ءِ۔ اوجہانی برادری آ زور شاغا کہ او فلسطین آ اسرائیلی ظلم ءِ تورفنگ اٹ تینا کڑد ءِ اداکے۔ داوخت آ ڈپٹی اسپیکر سید مرغلام مصطفیٰ شاہ پارے کہ محرم الحرام ننے ایثار و قربانی نا درس ایتک۔ اوپارےکہ دا تُو ننے کربلانا شہید آتا ہمو عظیم قربانی تا یات ترفک ہرا فتے او اسلام نا خاطر پیش کریر۔ اومسلم اُمہ ءِ صبر، سگ و اسہ ایلو ٹی ایلمی ءِ مون آ دننگ نا گرج آ زور شاغا۔
