اسلام آباد۔ 06 جولائی (اے پی پی) وزیراعظم محمد شہباز شریف پارینے کہ دورہ ءِ چین اٹی طے مروک معاہدہ و مفاہمتی یات داشت آتیا عملدرآمد اٹی تعطل ءِ سگنگ پننگک، چین اٹی طے مروک کمکاری نا معاہدہ و مفاہمتی یات داشت آتیا عملدرآمد نا تینٹ چاروکی ءِ کیوہ، چین آن انفارمیشن ٹیکنالوجی، مواصلات، معدنیات و کانڑ کنی و توانائی نا بشخ آتیٹی کمکاری نا پوسکن آ دور بناکننگ ءِ، دا بشخ آتیٹی پا ک چین کمکاری نا مون آ دننگ آن زرگزرانی شونداری، علاقائی رابطہ نا سوگوی و ہڑتوم آ مکل آتا تعلقداری پین سوگو مریک۔ وزیراعظم آفس میڈیا ونگ انا کنڈآن جاری اعلامیہ نا رداٹ وزیراعظم محمد شہباز شریف ہفتہ نادے آ ساڑی آ دورہ ءِ چین اٹی طے مروک آ کمکاری نا معاہدہ و مفاہمتی یات داشت آتیا عملدرآمد نا بابت بڑزکو کہولی دیوان نا کماشی ءِ کرے۔ داوخت آ وزیراعظم محمد شبہاز شریف پارے کہ چین پاکستان نا متکن آ سنگت ءِ ہرا پاکستان نا ہرمشکل و سخت وخت اٹی کمک ءِ کرے، چینی بڑزکو سرکڑدہ غاک پاکستانی ڈل انا ساڑی آ دورہ ٹی بے مٹ مہمانداری نا درشانی ءِ کریر۔ چین دنیا نا اسہ سوگو ءِ زرگزران اس جوڑ مرسا مون آ بسنے، پاکستان چین نا شونداری آن بھاز گڑا ہیل کننگ کیک۔ وزیراعظم پارے کہ چین اتون انفارمیشن ٹیکنالوجی ، مواصلات ، معدنیات و کانڑ کنی و توانائی نا بشخ آتیٹی کمکاری نا پوسکن آ دور بناکننگ ءِ، دا بشخ آتیٹی پاک چین کمکاری نا مون آ دننگ آن زرگزرانی شونداری، علاقائی رابطہ غاتا سوگوی و ہڑتوم آملک آتا تعلقداری پین سوگو مریک۔ اومستی پارے کہ دورہ ءِ چین اٹی طے مروک معاہدہ و مفاہمتی یات داشت آتیاعملدرآمد اٹی سلنگ ءِ سگنگ پننگک، چین اٹی طے مروک کمکاری نا معاہدہ و مفاہمتی یات داشت آتیا عملدرآمد نا تینٹ چاروکی ءِ کیوہ۔ داوخت آ حوال اٹی دیوان ءِ پاننگانے کہ ساڑی ہی ٹی چینی جوتا ساز کمپنی تا اسہ ڈل اس پاکستان اٹی تینا کارخانہ گدریفنگ نا بابت پاکستان نا دورہ ءِ کرینے، دا بشخ اٹی چینی کمپنی تا کنڈآن پاکستان اٹی 5آن 8 ارب ڈالر نا زرکاری نا کچ ساڑی ءِ۔ پاکستان جوتاساز کمپنی تا ایسوسی ایشن چینی کمپنی اتون اوفتا کارخانہ پاکستان اٹ گدریفنگ نا بابت پدریسہ رابطہ ٹی ءِ۔ داکان بیدس کشاری بشخ انا 12 پنی آ چینی کمپنی برجاسال پاکستان اٹ اڈہلوک آ فوڈ اینڈ ایگری ایکسپوٹی ہم پبی بشخ ہلیرہ۔ وزیراعظم کشاری بشخ اٹی پوسکن آ تربیت کن پاکستان آن اسہ ہزار طالب علم آتے سرکاری وظیفہ غا چین آ گدریفنگ نا بابت پیش رفت نا ہم جاچ ءِ ہلکر۔ وزیراعظم پارت کرے کہ ہر چار آصوبہ بشمول گلگت بلتستان و آزاد کشمیر نا طالب علم آتے میرٹ نا بنداو آ چین آ گدریفنگے، بلوچستان نا پسماندہ علاقہ غاتا طالب علم آتے پروگرام اٹی خصوصی اولیت تننگے، چین اٹی پوسکن آ کشاری تریبت کن طالب علم آتے بروک آ تعلیمی سمیسٹر آن گدریفنگ نا بناءِ کننگے۔ دیوان ءِ پاننگاکہ وزیراعظم نا دورہ ءِ چین اٹی طے مروک معاہدہ غاتا نتیجہ ٹی 100 آن زیات چینی کمپنی پاکستانی کمپنی تتون پاکستان اٹ کاروبار و زرکاری کن رابطہ ٹی ءُ۔ دیوان ءِ وزارت انفارمیشن ٹیکنالوجی نا کنڈآں ہواووے نا کنڈآن 3 لکھ طالب علم آتا فنی تربیت، کاروبار نا آسراتی کن ون اسٹاپ آپریشن و اسمارٹ گورننس و اسمارٹ سٹی آ پیش رفت آن ہم معلومدار کننگا۔ وزیراعظم واپڈا ءِ داسو و دیامر بھاشا غا چینی باتی تا سیکورٹی ءِ فول پروف کننگ کن سیف سٹی تا جوڑ کننگ نا پارت کرساپارے کہ دا ڈٹ آتے زوت ایسر اسکان سرکننگے۔ دیوان اٹی وزیراعظم ءِ پاکستان اٹ چین نا کنڈآن چندی مواصلاتی پنجر، بجلی و گوادر اٹی ڈٹ آتیا پیش رفت آہم معلومدار کننگا۔ وزیراعظم محمد شہباز شریف پارت کرے کہ گوادر ءِ ڈیہہ اٹی واپاری راہداری نا مرکز جوڑ کننگ کن گوادر بندرگاہ ، گوادر ہوائی اڈہ و گوادر صنعتی زون نا شونداری کن گام گیج آتے ترند کننگے، چینی شمسی پینل و ازباب جوڑ کروک آ کمپنی تتون پاکستان اٹ اوفتا کارخانہ گدرفنگ کن مذاکرات اٹی ترندی اتنگے۔ دیوان اٹی نائب وزیرِ اعظم و وزیرِ خارجہ محمد اسحاق ڈار، بنجائی وزیرجام کمال خان، عطاء اللہ تارڑ، عبدالعلیم خان، سردار اویس خان لغاری، ڈاکٹر مصدق ملک، رانا تنویر حسین، محمد اورنگزیب، احسن اقبال، وزیرِ مملکت شزہ فاطمہ خواجہ، خصوصی کمکار طارق فاطمی، ڈپٹی چیئرمین پلاننگ کمیشن جہانزیب خان و تعلقدار بڑزکو کمامدارآک ہم ساڑی ئسر۔
