اسلام آباد۔ 04 جولائی (اے پی پی) دفترخارجہ نا ترجمان ممتا ززہرہ بلوچ پارینے کہ پاکستان تدوک آ سال(2023) زندان تیٹی بند 485بھارتی شاری تے یلہ کرے ہرافتیان 6 سول بندی و 479 ماہی گیر اوار ئسر، نن بھارتی زندان تیٹی بند غٹ پاکستانی بندی تے زوت پدی اتنگ ءِ پک کننگ کن ہم کوشست آتے برجاتخنہ۔ پنچ شنبے نادے آداڑے پریس حوال اٹی اوپارے کہ پاکستان و بھارت یکم جولائی 2024آ 2008 نا قونصلر رسینگ نا معاہدہ نا رداٹ اسہ ایلونا تحویل اٹ بندی تا لڑتے اسہ ایلو ءِ تسر۔ اوپارے کہ پاکستان زندان تیٹی بند 254بھارتی شاری بندی و ماہی گیر آتا لڑءِ تس وخت اس کہ بھارت تینا زندان تیٹی بند 452پاکستانی شاری بندی و ماہی گیر آتا لڑ ءِ شیئرکرے۔ اوپارے کہ پاکستان نا کنڈآن بےگوا38 پاکستانی دفاعی کارندہ غاتا لڑءِ ہم بھارت ءِ تننگا ہرانابارواٹی خیال ءِ کہ او 1965 و1971 نا جنگ آتیان بھارت نا تحویل اٹی ءُ۔ ترجمان پارے کہ پاکستان دا انسانی ویل آتے اولیتی وڑاٹ ایسر کننگ کن سنبرینگوک ءِ و نن بھارتی زندان تیٹی بند غٹ پاکستانی بندی تا زوت واپسی ءِ پک کننگ کن ہم کوشست آتے برجاتخنہ۔ ترجمان پارے کہ دا کوشست آتا اسہ بشخ اسے نا وڑاٹ 2023اٹی 62 و 2024 اٹی 4 پاکستانی بندی تا وطن آ واپسی مس۔
