آستانہ۔4جولائی (اے پی پی): مزن وزیر محمد شہباز شریف ءُ بیلاروس ءِ صدر الیگزینڈر لوکا شینکو ءَ اقتصادی ءُ تجارتی یکوئی آناں گیش مھکم جوڑ کنگ ءِ جزم ءِ درشان کتگ۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آستانہ ءَ ایس سی او سروک دیوان ءِ موہ ءَ مزن وزیر محمد شہباز شریف ءَ صدر الیگزینڈر کاشینکو ءَ گوں گند ءُ نند کت۔ گند ءُ نند ءَ سیاس یکوئی ، تجارت ءُ سرمایہ کاری ، دیمپانی کمک ءُ دمگی جیڈھ آں ھوار جتا جتائیں جیڈھ آنی ھوالگ ءَ ھیال ریچی کت۔ مزن وزیر ءَ بیلاروس ءِ شنگھائی کمکی گل ءِ باسک بوھگ ءِ پد ءَ صدر لوکا شینکو ءَ را مبارک بات دیان ءَ گوشتگ کہ ایشی ءَ چہ گل گیش مھکم بیت۔ دوئیں سروک آں گوستگیں بازیں سال آنی ساھت ءَ پاکستان ءُ بیلاروس ءِ یکوئی آنی توامیں بھر آنی تہ ءَ پازیٹیو رند پد آنی بابت ءَ دل یکیمی ءِ درشان کتگ ءُ وت مہ وتی سیت مندیں کمک ءُ اقتصادی ءُ تجارتی یکوئی آناں گیش مھکم جوڑ کنگ ءِ جزم ءِ درشان کتگ۔ مزن وزیر ءَ بیلا روس ءِ صدر ءَ را حکومت پاکستان ءِبرآمدات آنی تہ ءَ گیشی ، السی مال ءُ مڈی آنی مھکمی ءُ دوستیں ملک آں گوں سرمایہ کاری ءِ نیمگ ءَ دلگوش کنگ ءِوسیلگ پاکستان ءِ اقتصادی برجائی ءِ پالیشی ءِ بابت ءَ گوشت۔ دوئیں سروک آں میاں اوستمانی ءُ دمگی دیمروئی آنی ھوالگ ءَ ھیال ریچی کت ءُ شنگھائی کمکی گل ایس سی او ءِ چیر دستی ءَ کار کنوکیں جتا جتائیں بھر آنی بابت ءَ چار ءُ تپاسی گپت۔ مزن وزیر ءَ ایمنیں ءُ برجمیں پڑے ءِ واستہ پاکستان ءِ کوشست ءُ واھشت آنی درشان کت۔
