مچ آ ملک انا 41 ضلع غاتیٹی انسدادِ پولیو مہم نا بناء

اسلام آباد۔ 01 جولائی (اے پی پی) مچ آملک انا 41 ضلع غاتیٹی دوشنبے نادے آ یکم جولائی آن بناکروک آ خصوصی انسداد پولیو مہم اٹی پنچ سال آن کم وئی نا 95 لکھ آن زیات چناتے پولیو آن بچفنگ نا پڑی کنفنگک، مہم اٹی بلوچستان نا 16 ، خیبرپختونخوا نا 11، سندھ انا 8، پنجاب نا 5، و اسلام آباد نا مخصوص یونین کونسل آتیٹی اُرا اُرا پولیو مہم چلیفنگک، بلوچستان اٹی پولیو کیس آتا تشخیص و 4 آن زیات ضلع غاتا سیوریج نا وڑتیٹی پولیو دین انا پک مننگ نا رداٹ پولیو آن بچفنگ نا مہم نا بناءِ کننگانے وخت اس کہ 11 ضلع غاتیٹی جزوی مہم مریک۔ وزیراعظم نا فوکل پرسن پولیو عائشہ رضافاروق لمہ وباوہ غاتیان خواست کرینے کہ او تینا چناتے ہرپولیو مہم اٹی پولیو نا پڑی المی کنفر تانکہ اوفتے معذوری نا سوب جوڑ مروک آ دا ناجوڑی آن رکھ تخنگ مریر۔ اوپارے کہ چناتے پولیو آن رکھ تخنگ و دا دین انا ملک آن چٹفنگ حکومت نا اولیت ءِ۔ نن پولیو ویکسی نیشن ٹیم تے شاری تا درگہ غا گدریفنگ اُن خاص وڑاٹ ہمو علاقہ غاتیٹی ہراڑے دین ساڑی ءِ براہ کرم دا ہیت ءِ پک کبو کہ نم دا پولیو ورکرآتیکن تینا درگہ غاتے ملیرے و تینا پنچ سال آن کم وئی چناتے پولیو آن بچفنگ نا پڑی ضرور کنفبو۔ کوآرڈی نیٹر نیشنل ایمرجنسی آپریشن سینٹر (این ای او سی ) محمد انوارالحق پارے کہ دااسہ بے کچ اہم ءُ پولیو مہم اسے ہرا دا علاقہ غاتیٹی چلیفنگ انگ ءِ ہراڑے دین نا پدریسہ ساڑی گری چناتیکن خطرہ اسے۔ اوپارے کہ پولیو پروگرام چناتا قوت مدافعت ءِ ودفنگ کن داسال داتم اسکان پنچ پولیو مہم اڈتسنے۔ بھاز انگا ضلع غاتیٹی دین انا ساڑی گری نا رداٹ لمہ وباوہ غاتیکن المی ءِ کہ او تینا چناتے پولیو نا پڑی کُننگ نا موقع ءِ زیان کپس و اودے قومی فرض اس تکسا ہرپولیو مہم اٹ پبی بشخ ہلیر۔