بلوچستان بورڈ آف انٹرمیڈیٹ اینڈ سیکنڈری ایجوکیشن میٹرک نا سالانہ امتحان تا نتیجہ غاتا پڑو ءِ کرے

کوئٹہ۔ 01 جولائی (اے پی پی) بلوچستان بورڈ آف انٹرمیڈیٹ اینڈ سیکنڈری ایجوکیشن نا کنٹرولر امتحانات عابدہ کاکڑ میٹرک نا سالانہ امتحان تا نتیجہ غاتا پڑو ءِ کرے ، اسہ لکھ 43 ہزار 849 طالب علم آتیٹی سرسہبی نا کچ 84 درسد ئس، بی آر سی لورالائی نا 4 طالب علم پدریسہ اولیکو مسہ پوزیشن وخت اس کہ کیڈیٹ کالج نا اسہ طالب علم اس مسٹ میکو پوزیشن ءِ تینا پن آ کرے۔ بلوچستان بورڈ آفس اٹی بلوچستان بورڈ آف انٹرمیڈیٹ اینڈ سیکنڈری ایجوکیشن نا کنٹرول امتحانات عابدہ کاکڑ و سیکرٹری محمد عظیم ساجدی تون اوار رزلٹ گزٹ نا پڑو ءِ کرسا پارے کہ بلوچستان اٹی سالانہ امتحان سال 2024 اٹی کل اسہ لکھ 43 ہزار 849طالب علم بشخ ہلکر و اسہ لکھ 21 ہزار 362 طالب علم پاس مسر، سرسہبی نا کچ 84.36 درسد ئس، جماعت نہم اٹی 67 ہزار 800 طالب علم آتیان 50 ہزار 558 طلباء پاس وخت اس کہ جماعت دہم اٹی 76 ہزار 49 طالب علم آتیان 70 ہزار 804 طالب علم سرسہب گوندنگانو، نہم اٹی سرسہبی نا کچ 74 درسد وخت اس کہ جماعت دہم اٹی سرسہبی نا کچ 93 درسد ئس۔ اوپارے کہ بلوچستان ریذیڈنشنل کالج لورالائی نا رسد خان ولد نعمت اللہ اولیکو، زین اللہ خان ولد نعمت اللہ خان ارٹ میکو، عبدالرحمان ولد عصمت اللہ صالم ، سید عبدالعلیم ولد سید نظام الدین و کیڈٹ کالج کوہلو نا شہزاد خان ولد گل شیر مسٹ میکو پوزیشن ءِ تینا پن آ کریر۔ اوسرسہب طالب علم آتے مبارکبادی ترسا پارے کہ ورناتیان قوم انا اومیت آک وابستہ ءُ ہندا طالب علم آک بلوچستان و پاکستان نا پن ءِ روشنا کیرہ۔