اسلام آباد۔ 28 جون (اے پی پی) وزیراعظم نا کوآرڈی نیٹر موسمیاتی بدلی و چاگڑدی رابطہ رومینہ خورشید عالم نا کماشی ٹی ٹاسک فورس انا دیوان اس اڈہلک ہراٹی گلوبل وارمنگ و باسنی نا ودوک آ ریسہ نا باندات تون اوار چندی امور تیا سجفنگا۔ جمعہ نادے آ وزارت موسمیاتی بدلی و چاگڑدی رابطہ نارداٹ داوخت آتران کرسا وزیراعظم نا کوآرڈی نیٹر موسمیاتی بدلی و چاگڑدی رابطہ پارے کہ باسنی نا ریسہ و نوکاپ نا شدت خور، جان جوڑی و زرگزران کن خطرہ اسے۔ رومینہ خورشید عالم پارے کہ داسال بشام نا پِر اوسطاََ 30 درسد زیات مننگ نا پیش گوئی ءِ، گمانی پِرتیٹی نوکاپ نا رداٹ رکھی گام گیج آتا دمدستی گرج ءِ۔ کوآرڈی نیٹر موسمیاتی بدلی و چاگڑدی رابطہ پارے کہ گمانی نوکاپ نا زہمی تا کمک کن جوڑ کروک ریلیف کیمپ آتا زیات آن زیات تشہیر کننگے ہراڑکن پرنٹ ڈیجیٹل و الیکٹرانک میڈیاو ریڈیو آن بیدس مسیت آتا لاؤڈ اسپیکر آتے کاریم اٹ اتنگے۔ رومینہ خورشید عالم پارے کہ ہروڑنا ایمرجنسی نا حالیت اٹی زالبول و چناتا خاص خیال ءِ تخنگے۔
