اسلام آباد۔ 28 جون (اے پی پی) وزیراعظم محمد شہباز شریف پارینے کہ دہشت گردی نا برخلاف خیبرپختونخوا نا الس غٹ آن زیات قربانی تسنو، 2010ء ٹی مروک آ این ایف سی ایوارڈ نا رداٹ دہشت گردی نا گواچی مننگ نا سوب آن دا صوبہ ءِ 590 ارب روپئی داتم اسکان تننگا ولے سی ٹی ڈی نا ادارہ صوبہ ٹی پورو مننگ کتو، خیبرپختونخواآنبار ایلو صوبہ غاک ہم دہشت گردی تون مون تسر ولے اوفتے دا مدا ٹی ہچ ا س ملیتو، چیف سیکرٹری خیبرپختونخوا نا تعیناتی کن 3 پن تا پینل اس گدریفنگانے دا بابت صوبائی حکومت نا کنڈآن ہچ ءُ ورندی اس بتنے، اگہ دا پینل اٹ اوار پن منظور اف تو معلومدار کیر نن پوسکن ءُ پینل اس مون ایتنہ۔ جمعہ نادے آ قومی اسمبلی ٹی اسد قیصر نا کنڈآن چست کروک ٹک آتا ورندی ءِ ترسا وزیراعظم پارے کہ اسد قیصر لائخ احترام ءِ ، اونا ہیت آتے جوانی اٹ بنگونن، اواین ایف سی نا بابت ہیت کرینے، این ایف سی ایوارڈ 2010ء ٹی جوڑ مس، ہمووخت انا وزیراعظم یوسف رضاگیلانی نا کماشی ٹی ہرچار آ صوبہ غاک اواری اٹ داڑآ امنا کریسر۔ وزیراعظم پارے کہ داوخت آ ملک اٹی دہشت گردی ترند ئس ہرانا غٹ آن زیات گواچی صوبہ خیبرپختونخوائس، ہموجاگہ نا الس بھلو قربانی اس تسر ہرافتے تاریخ یات تخک۔ اوپارے کہ دا این ایف سی ایوارڈ ناای ہم بشخ ئسٹ ہراڑآ دستخط بلوچستان اٹی مسوسس۔ اوپارے کہ دا این ایف سی ایوارڈ اٹی صوبہ غاتا بشخ آن خیبرپختونخوانا بشخ اسہ درسد تخنگاسس ہرا داسکان اودے ملنگ ءِ۔ داتم اسکان 590 ارب روپئی دہشت گردی نا برخلاف اونا کوشست آتا اعتراف اٹی ملا۔ او بلاشبہ بھلو قربانی تسنو، بلوچستان تون اوار ایلو صوبہ غاک ہم بھلو قربانی تسر ولے اوفتے ہچ اس رسینگتو۔ خیبرپختونخوا ٹی سی ٹی ڈی اسکان جوڑ مننگ کتو۔ 590 ارب آن پد ہم سی ٹی ڈی بے پورو ءِ ، نن سیاست کننگ خواپنہ۔ وزیراعظم پارے کہ خیبرپختونخوا نا چیف سیکرٹری نا تعیناتی کن نن روایت نا رداٹ مسہ پن تا پینل صوبائی حکومت ءِ تسن کہ اوفتیان پن ایتے ولے داسکان ورندی بتنے، اگہ اودے دا پینل آن پن اس پسند اف تو معلومدار کیر نن پین پن تیا تالان پینل اس ایتنہ۔
