اسلام آباد۔28جون (اے پی پی): راجی اسمبلی ءَ آیوکیں مالی سال ءِ بجٹ شور ءُ مشور آناں کانودی رنگ دیگ ءِ واستہ مالی بل 2024 ءِ منظوری دات۔ حکومت ءِ نیمگ ءَ بل ءَ مٹ ءُ بدلی بل ءَ ھوار کنگ بوتگ وھدیکہ اپوزیشن ءِ نیمگ ءَ چہ پیش کتگیں توامیں مٹ ءُ بدلی مردم آنی شور ءَ چہ رد کنگ بوتگ انت۔ راجی اسمبلی ءَ آدینگ ءِ روچ ءَ وزیر ءِ ھزانگ محمد اورنگزیب ءَ یکم جولائی 2024 ءَ چہ بندات بوھوکیں مالی سال ءِ واستہ بنجاھی حکومت ءِ مالی شور ءُ مشور آناں پد ءُ رند کنگ ءُ بازیں کانود آناں مٹ ءُ بدلی کنگ ءِ مالی بل 2024 ءَ را زوتاں زوت چار ءُ بچار کنگ ءِ جنز پیش کت ایشی ءِ جمعیت علما اسلام (ف) ءِ باسک عالیہ کامران ءَ ھلاپ کت۔ آئی ءَ ایشی ءِ ھک ءَ دلیل دیان ءَ گوشت کہ پیکیں شیر ءُ درمان آںی نیام آنی تہ ءَ گیشی بوتگ، دل ءِ نادراھی ءِ سامان آنی سر ءَ ٹؑیکس ءَ چہ علاج گران بھا بوتگ۔ نان فائلر ز ءِ نام ءَ سفری بندش جنگ بوھگ ءَ انت ایشی ءَ چہ سرجمیں راج آماچ بیت۔ پٹ ءُ پول ءُ وانگ ءُ زانگ ءِ سر ءَ ٹیکس جنگ بوھگ ءَ انت۔ سنی اتحاد کونسل ءِ باسک علی محمد خان ءَ گوشتگ کہ اے بجٹ ءَ چہ لس مردم آنی زندمان ءِ تہ ءَ اچ رنگیں گہتری نہ اتکگ۔ ھمے ھاترا اے بجٹ ءِ ھلاپ آں۔ 25 ءَ 30 ہزار کلدا ھمک ماہ گس ءِ بجٹ جوڑ کنگ بوت نہ کنت۔ ملک ءِ معیشت گہتر جوڑ کنگءِ واستہ سوتی نظام ءَ چہ رکھگ المی انت۔ علی گوہر خان ءَ گوشت کہ مالی بل ءَ چہ الس آناں گیشاں چہ گیش ریلیف دیگ مول ءُ مراد بیت ، اے دور ءَ درستاں چہ کم زرامبار آنی نمبگ ءُ زر ءِ شنگ ءُ تالانی بوتگ۔ پی آئی اے ءُ ڈسکوز ءِ مڈی ءُ مراس آنی مالیت 1000 ارب کلدار انت۔ بجٹ ءِ اندر ءَ 30 ارب کلدار ءِ گرگ سہرا کنگ بوتگ۔ ایف بی آر ءِ سٹرکچر ءَ را مٹی آرگ ءَ ابید ٹیکس نیٹ گیش بوت نہ کنت۔
