نیویارک۔ 27 جون (اے پی پی) بنجائی وزیر داخلہ محسن نقوی چینی ہم منصب کیو آئی یانجن تون اہم اوڑدہی اس کرے ہراٹی پاک چین تعلقداری و سیکورٹی امور آ سرجمی اٹ گپ وتران کننگا۔ دااوڑدہی نیویارک اٹی اقوام متحدہ ٹی چینی مشن نا دفتراٹی مس۔ اوڑدہی ٹی کانود نافذ کروک آ ادارہ و چین نا کمک، ٹریننگ و پوسکن آازباب و ٹیکنالوجی نا کاریم اٹ اتنگ نا بارواٹی ہم گپ وتران مس۔ پیپلز ری پبلک آف چائنا نا ہم منصب کیو آئی یانجن اسلام آباد اٹی درملکی خاص کر چینی شاری تا رکھ اکن ایس پی یو نا جوڑ کننگ نا گام انا ستاءِ کرے۔ کیو آئی یانجن ایس پی یو نا ٹریننگ و ایلو امور اٹی پبی کمکاری نا باوری کرفسا پارے کہ پاکستان چین ہرموسم نا سنگت ءُ۔ پاکستان و چین نا سنگتی فولاد آن زیات مضبوط ءِ۔ چین پاکستانی کانود نافذ کروک آ ادارہ غاتا ٹریننگ و کاریم نا کچ ءِ ودفنگ کن پبی کمک کیک۔ بنجائی وزیر داخلہ محسن نقوی داسوٹی پیش بروک آ است ہسون واقعہ غا مروک آ پیش رفت آن معلومدار کرے۔ چینی وزیر داخلہ کیس آ مروک آ پیش رفت آ است جمی نا درشانی ءِ کرے۔ اوپارےکہ پاکستانی ادارہ غاک خواری و پروفیشنل وڑاٹ داکیس ءِ ٹریس کریر۔ پیپلز ری پبلک آف چائنا نا ہم منصب وزیرداخلہ محسن نقوی ءِ ستمبر اٹی چین اٹی مروک آ گلوبل سیکورٹی فورم اٹی بشخ ہلنگ نا سلہ خلک۔ بنجائی وزیرداخلہ محسن نقوی چینی ہم منصب ءِپاکستان نا دورہ نا سلہ خلک۔ اونا پاننگ ئس کہ چین نا وزارت داخلہ نا ایڈوائزری گروپ زوت پاکستان نا دورہ ءِ کیک۔ چین اتون سنگتی آ نن غٹ گمر کینہ۔ پاک چین سنگتی اقوام عالم کن بے مثال ء۔ چینی شاری تا سیکورٹی نا فول پروف بست وبند کرینن۔ بنجائی وزیر داخلہ محسن نقوی و چینی ہم منصب کیو آئی یانجن چارمیکو یواین کوپ کانفرنس اٹی بشخ ہلنگ کن نیویارک اٹی ساڑی ءُ۔
