اسلام آباد۔ 27 جون (اے پی پی) نائب وزیراعظم و وزیرخارجہ محمد اسحاق ڈار پارینے کہ امریکی ایوان نمائندگان اٹی منظور مروک آ قرارداد آ دفترخارجہ ردعمل تسنے، قومی اسمبلی ٹی ہم بجٹ نا منظوری آن پد دابابت قرارداد اس اتینہ، پاک ایران گیس ڈ ٹ اتون اوار خارجہ پالیسی نا بابت ایوان ءِ حوال تننگ کن تیار اُن، حکومت فلسطین نا ویل، کشمیر، اسلاموفوبیا و سوشل میڈیا غا نبی پاک صلی اللہ علیہ و آلہ وسلم نا شان اقدس نا بارواٹی گستاخانہ مواد نا بابت اوآئی سی تون اوار ہرفورم آ توار بڑزکرینے، پاکستان ساڑی آ زرگزرانی حالیت آتیان پیش تمنگ نا پبی لائخی تخک، داٹی زرس وخت لگک نن دا حالیت آتیان پیشن پیش تمنہ۔ پنچ شنبے نادے آ قومی اسمبلی ٹی وزارت خارجہ نا مطالبات زر آ اپوزیشن نا کٹوتی نا تحریک آتیا شرہ ءِ چٹفسا اوپارے کہ کٹوتی نا تحریک آتا مسخت ہندامریک کہ سرحال آ شرہ کننگے۔ اوپارے کہ باسک آتا کنڈآن دا سلاہ نا ستاءِ کینہ کہ خارجہ پالیسی نا بابت اسہ جتا ءُ سیشن اس مرے، نن خارجہ پالیسی نا بابت پورو حوال تننگ کن تیار اُن۔ اوپارے کہ تدوک آ دے دفترخارجہ امریکی ایوان نمائندگان اٹی منظور مروک آ قرارداد آ تینا ردعمل ءِتسنے۔ بجٹ نا منظوری آن پدہم دا قرارداد نابابت اسہ قرارداداس اتینہ۔ اوپارے کہ پیشن نا ملک رہینگوک پاکستانی تے وونٹ نا حق تننگ نا بابت آئین اٹ ترمیم کیر نن اونا سپورٹ ءِ کینہ۔ نن پیشن نا ملک رہینگوک پاکستانی تے وونٹ انا حق تننگ خوانہ۔
