اسلام آباد۔ 26 جون (اے پی پی) وزیراعظم محمد شہباز شریف چینی صنعت آتا پاکستان آ گدریفنگ نا بابت چینی و پاکستانی کمپنی تا نیام اٹ جوائنٹ وینچر ڈٹ انا منظوری ءِ ترسا پارینے کہ پاکستان اٹ تہہ و پیشن زرکاری نا مون آ دننگ حکومت نا اولیت ءِ،حکومت پوریاگر و زرکارآتیکن کاروبار دوست چاگڑد اس فراوان کننگ کن ہرممکن گام گیج کننگ اٹی ءِ۔ وزیراعظم آفس نا میڈیا ونگ آن جاری بیان نا رداٹ وزیراعظم نا کماشی ٹی زرکاری بورڈ انا امور آاہم دیوان چارشنبے نادے آ اڈہلک ۔ داوخت آ وزیراعظم تینا دورہ ءِ چین اٹی شینزین اٹی پاکستانی و چینی کمپنی تا نیام اٹ مفاہمتی یات داشت آتا بابت پیش رفت آ جوان رپورٹ اس پیش کننگ نا پارت کرے۔ وزیراعظم خصوصی اقتصادی زونز ون سٹاپ شاپ نا کانود نا مسودہ غا دورہ ءِ چین آن پد مروک آ پیش رفت نا رداٹ نظرثانی نا پارت کرساپارے کہ چین نا ٹیکسٹائل ، سِل، فٹ ویئر و ایلو صنعت آتا پاکستان اٹ ری لوکیشن نا بابت بھلو کچ اس ساڑی ءِ۔ دیوان ءِ سیکرٹری زرکاری بورڈ انا کنڈآن تروک آ حوال اٹی پاننگاکہ چینی صنعت آتا پاکستان اٹ ری لوکیشن نا بابت گام گیج کننگ انگ ءِ، اسلام آباد بزنس فیسلی ٹیشن ہند انا جوڑ کننگ نا بابت چینی چاہندار آتا خذمت دوئی کننگ انگ ءِ ، آسان کاروبار ایکٹ انا مسودہ ءِ زوت کابینہ کیٹی لیجسلیٹوکیس آتیٹی گدریفنگ انگ ءِ۔ دیوان اٹی بنجائی وزیر نجکاری و زرکاری عبدالعلیم خان،بنجائی وزیر واپار جام کمال، بنجائی وزیر خزانہ و محصولات محمد اورنگزیب ، بنجائی وزیر پیٹرولیم ڈاکٹر مصدق ملک، وزیراعظم ناکوآرڈینیٹر رانا احسان افضل و تعلقدار بڑزکو سرکاری آفیسر آک بشخ ہلکر۔
