کوئٹہ۔ 26 جون (اے پی پی) بلوچستان نا وزیرداخلہ میر ضیاء اللہ لانگو پارینے کہ بلوچستان اٹی دہشت گرد آتا نیٹ ورک ءِ ہلنگا، کالعدم ٹی ٹی پی نا دفاعی شوریٰ نا سروک دہشت گرد نصراللہ عرف مولوی منصور ءِ دزگیر کننگا، دزگیر کمانڈر نصراللہ ٹی ٹی پی شوریٰ نادفاعی کمیشن نا ممبر ہم رہینگانے، دہشت گرد کارروائی تا پد اٹ بھارت نا دُو ءِ۔ بھارت دہشت گرد آتا مالی کمک ءِ کیک۔ چارشنبے نادے آکوئٹہ ٹی ترجمان بلوچستان حکومت شاہد رند و ڈی آئی جی اعتزاز گورایہ تون اوار پریس کانفرنس اٹی صوبائی وزیر داخلہ پارے کہ کمانڈر نا دزگیری آ انٹیلی جنس ادارہ غاتے مبارکبادی ایتیوہ، داسہ کس اسے داٹی شک مف کہ داواقعہ غاتا پد اٹ بھارت نا دُو ءِ ، بھارت کینیڈا و امریکہ ٹی ہم داوڑنا کارروائی تیٹی اوار ءِ، او 20 سال آن اوغانستان آن پاکستان اٹی دہشت گردی کرفنگ اٹی ءِ۔ تدوک آ دے کانود نافذ کروک و انٹیلی جنس ادارہ غاک اسہ پیچیدہ آپریشن اس کریر ہراٹی اہم دہشت گرد کمانڈرآتے دزگیرکننگا ہرافتے ٹی کمانڈر نصراللہ و کمانڈر ادریس اوار ءُ۔ صوبائی وزیر داخلہ پارے کہ بلوچستان نا الس داوڑنا زموار آتے چار تینا خن تے ملر، کودک مخلوق ءِ ریفسا مش تیا دننگک۔ اوپارے کہ بلوچستان نا السءِ کنا کلہو ءِ کہ ہراورناک مش تیا ہنانو اوفتے ریفسا و گمراہ کننگانے دا پاکستان نما وطن ءِ تینا سیکورٹی فورس آتون تفبو ودہشت گرد آتاڈٹ آتے بے سہب کبو۔ صوبائی وزیر داخلہ پارے کہ ننا گڑاس گمراہ مخلوق تینا خاہوت آتا ہم نسخان ءِ کننگ اٹی ءُ ، ننا سیکورٹی ایجنسیک تینا لائخی تے منفیر ، انٹیلی جنس ایجنسیک بھاز بھلو بھسکاری اسے نا ڈٹ جوڑ کروک آتے ہلکنو۔ اوپارے کہ بھارت دہشت گرد آتا مالی کمک ءِ کیک۔ صوبائی وزیر داخلہ پارے کہ ورناک دشمن نا عزم ءِ پہہ مریر و اوفتا ہیت آتیٹی بفس۔ داوخت آ اودہشت گرد نصراللہ نا ویڈیو کلہو ءِ بِنفے۔ نصراللہ محسود تینا بیان اٹی پارے کہ ای تصدیق اٹ پاننگ کیوہ کہ ٹی ٹی پی نا مچ آ نظام خاص کر مالی نظام نا پد اٹ بھارت ءِ۔ اوپارے کہ ٹی ٹی پی راہشون مفتی نور ولی محسود کابل اٹی بھارتی سفارت خانہ غا ہنا ’’را‘‘ نا کمامدارآتون اوڑدہی کرے ۔ اوغان حکومت ٹی ٹی پی ءِ نئے بیرہ مالی کمک فراوان کننگ اٹی ءِ بلکن اوفتا ٹریننگ و افرادی قوت ہم فراوان کننگ ءِ۔
